پیپلز بس سروس کے کرایے بڑھانے کا اعلان۔۔ اطلاق کب سے ہوگا؟

کراچی کے شہریوں کے لیے ایک حیران کن خبر سامنے آئی ہے، جہاں پیپلز بس سروس کے کرایوں میں 60 فیصد تک اضافہ کر دیا گیا ہے، جس نے عوام کو پریشان کر دیا ہے۔ نئے کرایوں کا باضابطہ اعلان کیا گیا ہے، اور نوٹیفکیشن کے مطابق مختلف روٹس پر کرائے 20 فیصد سے 60 فیصد تک بڑھا دیے گئے ہیں۔

اعلان کے مطابق، یکم فروری سے بسوں پر نئے نرخ آویزاں کر دیے جائیں گے اور ان کا اطلاق بھی اسی تاریخ سے ہوگا۔ اس وقت کم از کم کرایہ 50 روپے اور زیادہ سے زیادہ کرایہ 100 روپے ہے، جو اب نئے اضافے کے بعد مزید بڑھ جائے گا۔

حکام کا کہنا ہے کہ کرایوں میں اضافہ ایندھن کی قیمتوں اور آپریشنل اخراجات میں اضافے کی وجہ سے کیا گیا ہے۔ تاہم، شہریوں نے اس فیصلے پر سخت تشویش کا اظہار کیا ہے، خاص طور پر ان لوگوں نے جو روزانہ کے سفر کے لیے پیپلز بس سروس پر انحصار کرتے ہیں۔