سیڑھیاں اور لفٹ آپ دونوں میں کس کا زیادہ استعمال کرتے ہیں؟ شاید آپ کا جواب لفٹ ہوگا۔ مگر کیا آپ جانتے ہیں کہ لفٹ کا زیادہ استعمال موت کے قریب لے جا سکتا ہے۔
ایک نئی تحقیق سے یہ بات سامنے آئی ہے کہ اگر کوئی شخص طویل عرصے تک زندہ رہنا چاہتا ہے تو جب بھی کسی اوپری منزل کی طرف چڑھنا ہو لفٹ میں جانے کے بجائے سیڑھیاں چڑھنے کو ترجیح دے۔ اس سے آپ کے دل کی صحت بہتر رہے گی۔
تحقیق کے مطابق برطانوی محققین نے حیران کن نئی تحقیق میں بتایا ہے کہ جو لوگ باقاعدگی سے سیڑھیاں چڑھتے ہیں ان میں کسی بھی وجوہات سے مرنے کا خطرہ 24 فیصد تک کم ہوجاتا ہے اور دل کی کسی بیماری سے مرنے کا خطرہ 39 فیصد کم ہوتا ہے۔
سیڑھیاں چڑھنے والے افراد کا ان لوگوں سے موازنہ کیا گیا جو ہمیشہ لفٹ کا استعمال کرتے ہیں۔ نتائج سے یہ بھی معلوم ہوا کہ سیڑھیاں چڑھنا دل کا دورہ، ہارٹ فیل ہونے یا فالج کا کم خطرے سے بھی منسلک ہے۔
برطانیہ میں ناروِچ یونیورسٹی ہاسپٹل فاؤنڈیشن ٹرسٹ کی محقق، ڈاکٹر سوفی پیڈوک کا اس تحقیق سے متعلق کہنا تھا کہ اگر آپ کے سامنے سیڑھیاں چڑھنے یا لفٹ لینے کے دونوں آپشنز آئیں تو آپ سیڑھیوں سے جانے کا انتخاب کریں کیونکہ یہ آپ کے دل کی صحت کے لیے بہت فائدہ مند ثابت ہوگا۔
ان کا مزید کہنا تھا کہ سیڑھیاں چڑھنا جسمانی سرگرمی کی ایک انتہائی آسان عملی شکل ہے لیکن اکثر لوگ اسے جلد بازی میں نظرانداز کردیتے ہیں۔