آسٹریلوی آل راؤنڈر گلین میکس ویل نے ورلڈ کپ جیتنے کے بعد اپنے کپتان پیٹ کمنز اور انڈین وزیراعظم نریندر مودی کی سوشل میڈیا پر وائرل ہونے والی ویڈیوز کو ’مزاحیہ‘ قرار دیا ہے۔’دا ایج‘ کو دیے گئے ایک انٹرویو میں گلین میکس ویل نے احمدآباد میں ورلڈ کپ جیتنے کے بعد پریزینٹیشن کے دوران کا قصہ بیان کرتے ہوئے کہا کہ ’پوسٹ میچ پریزینٹیشن کی ویڈیوز کافی مزاحیہ تھیں جہاں پیٹ کمنز نے مودی سے ہاتھ ملایا اور پوڈیم (سٹیج) پر پھنس گئے۔‘خیال رہے آسٹریلیا کے ورلڈ کپ جیتنے کے بعد انڈین وزیراعظم نریندر مودی نے پیٹ کمنز کو ٹرافی دی تھی جس کے بعد وہ باقی آسٹریلین کھلاڑیوں سے ہاتھ ملانے چلے گئے تھے اور آسٹریلوی کپتان کو کئی منٹوں تک اکیلے ٹرافی پکڑے کھڑا رہنا پڑا تھا۔گلین میکس ویل نے اس قصے کی مزید تفصیلات بتاتے ہوئے کہا کہ ’ایسا لگتا ہے کہ یہ سب تقریباً 10 منٹ تک جاری رہا ہوگا، پیٹ کمنز ٹرافی پکڑے باقی گروپ (آسٹریلوی کھلاڑیوں) کا انتظار کرتے رہے۔‘آسٹریلوی کپتان پیٹ کمنز کی تعریف کرتے ہوئے گلین میکس ویل نے کہا کہ ’لیکن اس سارے معاملے میں انہوں نے اپنی کلاس دکھائی اور اس بات کا بتنگڑ نہیں بنایا۔ انہوں نے سوچا کہ میں انتظار کروں گا اور سب کو عزت دوں گا۔‘گلین میکس ویل نے مزید کہا کہ شاید کوئی اور پیٹ کمنز کی جگہ ہوتا تو کسی اور طرح کا ردِعمل سامنے آتا۔خیال رہے پچھلے مہینے اختتام پذیر ہونے والے ورلڈ کپ کے فائنل میں آسٹریلیا نے انڈیا کو سات وکٹوں سے شکست دے کر میگا ایونٹ کی ٹرافی چھٹی مرتبہ اپنے نام کی تھی۔