واٹس ایپ دنیا کی مقبول ترین پیغام رسانی کی ایپلیکیشن ہے جس کا کوئی متبادل اب تک سامنے نہیں آیا ہے۔
یہ ایپلیکیشن دن بہ دن نئے اور جدید فیچرز کے ساتھ سامنے آرہی ہے جس کے باعث صارفین کی دلچسپی میں اضافہ ہورہا ہے،ایک رپورٹ کے مطابق دنیا بھر سے واٹس ایپ چلانے والوں کی تعداد 2 ارب سے زیادہ ہے۔
وہیں میٹا کی زیرملکیت میسجنگ ایپلیکیشن میں ابھی تک صارفین ایک موبائل فون میں صرف ایک ہی واٹس ایپ اکاؤنٹ استعمال کرسکتے تھے۔ مگر اب ایک اچھی خبر سامنے آئی ہے۔
جیسا کہ پہلے ایسا ہوا کرتا تھا کہ ایک فون میں 2 واٹس ایپ اکاؤنٹ چلانے کے لیے ایپ کی سیکنڈری کاپی بنانا پڑتی تھی مگر اب میسجنگ ایپ کی یہ خامی دور ہونے جا رہی ہے۔
میٹا کے چیف ایگزیکٹو مارک زکربرگ نے ایک نئے فیچر کا اعلان کیا ہے جس کے ذریعے صارفین ایک فون میں 2 مختلف واٹس ایپ اکاؤنٹس استعمال کر سکیں گے۔
مارک زکربرگ کے اعلان کے بعد کمپنی کی جانب سے جاری کردہ بیان کے مطابق اس فیچر کو متعارف کرا دیا گیا ہے اور اب صارفین بیک وقت 2 واٹس ایپ اکاؤنٹس کو ایک ڈیوائس پر استعمال کر سکیں گے۔
یہ فیچر ان افراد کے لیے بہترین ثابت ہوگا جو واٹس ایپ کو دفتری سرگرمیوں کے لیے بھی استعمال کرتے ہیں،دو علیحدہ اکاؤنٹ سپورٹ سے وہ آفس کے لیے اور نجی زندگی کے لیے الگ الگ واٹس ایپ استعمال کر سکیں گے۔
یہ فیچرآئندہ چند ہفتوں میں تمام صارفین کو دستیاب ہوگا۔
اس فیچر کو استعمال کرنے کے لیے ضروری ہوگا کہ فون میں ڈوئل سم سپورٹ موجود ہو تاکہ 2 مختلف نمبروں کو 2 واٹس ایپ اکاؤنٹس کے لیے استعمال کیا جاسکے۔
مذکورہ فیچر کو کس طرح استعمال کیا جائے گا؟
اس فیچر کو استعمال کرنے کے لیے واٹس ایپ سیٹنگز اوپن کرکے اپنے نام کے آگے بنے ڈراپ ڈاؤن ایرو پر کلک کریں۔
وہاں ایڈ اکاؤنٹ کا آپشن ہوگا جس پر کلک کرکے دوسرے واٹس ایپ اکاؤنٹ کو ایڈ کرلیں۔
کمپنی کے مطابق صارف ہر اکاؤنٹ کی پرائیویسی اور نوٹیفکیشن سیٹنگز کو کنٹرول کر سکے گا۔