انڈیا کی خلائی ایجنسی اسرو نے کہا ہے کہ وہ نئے قمری دن کے آغاز کے ساتھ ہی اپنے مون لینڈر اور روور سے رابطہ کرنے کی کوشش کر رہے ہیں تاہم ان کو ابھی تک کوئی سگنل نہیں مل سکا۔
واضح رہے کہ یہ لینڈر اگست کے مہینے میں روور کو اپنے اندر لے کر چاند کے جنوبی قطب کے قریب اترا تھا۔
دو ہفتوں کے دوران وہاںڈیٹا اور تصاویر جمع کی گئی تھیں جس کے بعد اسے ’سلیپ موڈ‘ میں ڈال دیا گیا تھا۔
اسرو نے امید ظاہر کی تھی کہ اس کی بیٹریاں دوبارہ چارج ہو جائیں گی اور 22 ستمبر کے قریب سورج طلوع ہونے پر ماڈیول سلیپ موڈ سے نکل کر دوبارہ فعال ہو جائیں گے تاہم یہ بھی عین ممکن ہے کہ چاند پر رات کی شدید سردی بیٹریوں کو نقصان پہنچانے کا سبب بن جائے۔
جمعے کو اسرو نے ایکس (سابقہ ٹوئٹر) پر پوسٹ کیا کہ وکرم لینڈر اور پرگیان روور کے ساتھ رابطہ قائم کرنے کی کوششیں جاری رہیں گی۔
انڈیا نے گذشتہ ماہ 23 اگست کو کامیابی کے ساتھ اپنا چندریان 3 مشن چاند پر اُتار کر تاریخ رقم کی اور اس طرح وہ چاند کے جنوبی قطب کے قریب اترنے والا پہلا ملک بن گیا تھا۔
اس کے ساتھ ہی انڈیا ان چند ملکوں کی فہرست میں بھی شامل ہو گیا جو چاند تک پہنچنے میں کامیاب رہے ہیں۔ اس فہرست میں امریکہ، چین اور سابق سوویت یونین شامل ہیں۔
چاند پر لینڈنگ کا منصوبہ احتیاط سے چاند کے دن کے آغاز کے ساتھ موافق بنایا گیا تھا تاکہ وکرم اور پرگیان کو کام کرنے کے لیے دو ہفتے سورج کی روشنی مل سکے۔
چاند پر ایک دن زمین پر چار ہفتوں کے برابر ہوتا ہے، جس میں ایک دن اور ایک رات تقریباً 14 دن تک جاری رہتی ہے۔
خلائی ایجنسی نے مون لینڈر اور روور کی نقل و حرکت اور نتائج کے بارے میں باقاعدہ اپ ڈیٹس فراہم کیں اور ان کی طرف سے لی گئی تصاویر بھی شیئر کیں۔
مون لینڈر اور روور کو سلاتے وقت (سلیپ موڈ) اسرو نے امید ظاہر کی تھی کہ کہ وہ اگلے قمری دن کے آغاز پر دوبارہ بیدار ہو جائیں گے۔
دعویٰ کیا گیا تھا کہ اس حوالے سے تمام ذمہ داریاں مکمل کر لی گئی ہیں لیکن اسرو کے سابق سربراہ اے ایس کرن کمار نے بی بی سی کو بتایا کہقطب قمری کے قریب رات کا درجہ حرارت معمول کے مطابق منفی 200 سے منفی 250 ڈگری سینٹی گریڈ تک گر جاتا ہے اور بیٹریاں اس درجہ حرارت پر کام کرنے یا چلنے کے لیے ڈیزائن نہیں کی گئی ہیں۔
اسرو نے ساتھ ہی اپنی توقعات پوری نہ ہونے کی صورت کے حوالے سے یہ بھی کہا کہ اگر وکرم اور پرگیان بیدار نہ ہوئے تو وہ چاند پر ’انڈیا کے قمری سفیر کے طور پر‘ موجود رہیں گے۔