بھارتی فلموں میں اکثر انڈر ورلڈ ڈانز کی کہانیاں بیان کی جاتی ہیں کیونکہ صرف فلموں میں ہی نہیں بلکہ حقیقی زندگی میں بھی انڈر ورلڈ کا اثر نمایاں ہے، ہدایت کار کرن جوہر بھی مافیا کا نشانہ بنے لیکن شاہ رخ خان نے انہیں بچالیا۔
بالی وڈ کے ہدایتکار کرن جوہر نے اپنے ایک انٹرویو میں ماضی کے خوفناک واقعے سے متعلق بتایا کہ فلم ’کچھ کچھ ہوتا ہے‘ کے پریمئر کے دوران مجھے انڈر ورلڈ ڈان کی جانب سے دھمکی ملی اور دھمکی کے پیشِ نظر میں ایک ہوٹل میں خفیہ طور پر رہ رہا تھا۔
کرن جوہر نے بتایا کہ شاہ رخ خان کو پتا چلا تو وہ میرے ساتھ کھڑے رہے اور کہا کہ ’آپ میرے ساتھ رہو۔ میں آپ کیلئے اپنے سینے پر گولی کھاؤں گا۔
‘اس سے پہلے کرن جوہر نے اپنی خود نوشت میں دھمکی ملنے کا قصہ بیان کیا تھا جو کچھ یوں ہے: ’ایک دن فون کی گھنٹی بجی تو میری والدہ نے اٹھایا۔
وہ انڈر ورلڈ سے کال تھی۔ ایک آدمی بولا کہ ’آپ کے بیٹے نے سرخ ٹی شرٹ پہنی ہوئی ہے۔ میں اسے ابھی دیکھ سکتا ہوں اور اگر آپ یہ فلم جمعہ کو ریلیز کرتے ہیں تو ہم اسے گولی مار دیں گے‘۔
کرن جوہر کے مطابق شاہ رخ خان جو جب پتا چلا تو انہوں نے میری والدہ کو فون کیا اور انہیں یقین دلایا کہ ان کے بیٹے کو کچھ نہیں ہوگا۔
یاد رہے کہ بھارت میں انڈر ورلڈ کئی برسوں سے فلم انڈسٹری پر حاوی رہی ہے، بھارت کی کئی فلموں میں انڈر ورلڈ کا پیسہ بھی لگایا جاتا ہے جبکہ معروف پنجابی گلوکار کچھ عرصہ قبل مافیا کے ہاتھوں قتل ہوئے تھے۔