بلیو وہیل اور پب جی کے بعد ٹک ٹاک نے بھی خطرناک ٹاسک دیکر زندگیوں سے کھیلنا شروع کردیا، 14 سالہ نوجوان چیلنج پورا کرتے ہوئے جان گنوا بیٹھا۔
امریکی ریاست میساچوسٹس کے ایک اسکول میں میٹرک کاطالبعلم ٹک ٹاک پر ’ون چپ چیلنج‘ میں حصہ لینے کی وجہ سے انتقال کر گیا۔
ٹک ٹاک پر ان دنوں ون چپ چیلنج بہت زیادہ وائرل ہورہا ہے جس میں ’پاکوئی‘ نامی کمپنی کا مصالحے دار چپس کھانا ہوتا ہے۔ کمپنی لوگوں کو چیلنج کرتی ہے کہ وہ اس اسنیک کو کھانے کے بعد مرچوں کا اثر کم کرنے کیلئے کچھ بھی کھانے یا پینے سے خود کو روکے رکھیں تاکہ انکی برداشت کرنے کی صلاحیت کا امتحان لیا جاسکے۔
میڈیا رپورٹس کے مطابق امریکا کے 14 سالہ ہیرس وولوبہ کو اسکول میں اسکے دوست نے یہ چیلنج کرنے کو کہا تھا ، اس نے اپنے دوست کی جانب سے دیے گئے انتہائی مصالحے دار چپس کھالیے جس سے نوجوان کے پیٹ میں درد شروع ہوگیا۔
ہیرس کی والدہ کے مطابق بیٹے کی طبیعت خراب ہونے پر اسکول سے فون آیا تھا جس کے بعد وہ اسکو گھر پر لے آئے تاہم کچھ دیر بعد ہیرس نے بہتر محسوس کرنا شروع کردیا تھا۔
ہیرس وولوبہ کی والدہ کا کہنا ہے کہ ہیرس باسکٹ بال کھیلنے کیلئے باہر جارہا تھا کہ اسکی طبیعت پھر خراب ہوئی جس پر اسکو قریبی اسپتال لے جایا گیا جہاں وہ انتقال کرگیا۔
پولیس نے نوجوان کی موت کے حوالے سے کارروائی شروع کردی ہے تاہم موت کی وجہ کا تعین پوسٹ مارٹم رپورٹ کے بعد کیا جائے گا۔
یاد رہے کہ اس سے پہلے بلیو وہیل اور پب جی نامی گیمز میں نوجوانوں کو ایسے ٹاسک دینے کی اطلاعات سامنے آئی تھیں جن کو پورا کرتے ہوئے کئی لوگوں کی جان گئی اور اب ٹک ٹاک نے بھی ایسے چیلنجز دیکر نوجوانوںکی زندگیوں سے کھیلنا شروع کردیا ہے۔