Getty Imagesسان فرانسسکو میں ٹوئٹر کے ہیڈکوارٹر پر لگا چڑیا کا لوگو جو نیلام کیا جا رہا ہے
ٹوئٹر کا نام ایکس (X) سے تبدیل کرنے کے بعد ارب پتی ایلون مسک ٹوئٹر کی عمارت پر موجود اس کے پرانے لوگو اور دیگر اشیا کو نیلامی کے لیے دے رہے ہیں۔
نیلام کیے جانے والی 584 اشیا میں کافی ٹیبلز، بڑے سائز کے پنجرے اور وائرل ہونے والی تصاویر کی آئل پینٹنگز بھی شامل ہیں۔
اس کے علاوہ کئی میز اور کرسیاں، ایک ڈی جے بوتھ اور اتنے موسیقی آلات ہیں جو ایک بینڈ کی ضرورت کے لیے کافی ہیں۔
گذشتہ سال سوشل میڈیا پلیٹ فارم ٹوئٹر کو خریدنے کے بعد سے ایلون مسک نے اخراجات کو کم کرنے کی کوشش میں کمپنی کی ہزاروں ملازمتوں میں کمی کی ہے۔
نیلامی کے لیے پیش ہونے والے ٹوئٹر کے نشانات میں سے ایک ابھی بھی کمپنی ہیڈ کوارٹر کی عمارت پر لگا ہوا ہے۔
نیلامی کی فہرست میں لکھا ہے کہ ’چڑیا اب بھی عمارت کی ایک طرف نصب ہے۔ خریدار مناسب اجازت ناموں کے ساتھ سان فرانسسکو سے لائسنس یافتہ کمپنی کی خدمات حاصل کرنے کا ذمہ دار ہے،‘
گذشتہ مہینے سان فرانسسکو کی انتظامیہ نے ٹوئٹر کے مختلف نشانات کو ہٹانے کی کوشش کو عارضی طور پر روک دیا تھا۔
ٹوئٹر پر وائرل ہونے والی تصویروں کی دو آئل پینٹنگز بھی نیلام کی جائیں گی۔
پہلی تصویر 2014 اکیڈمی ایوارڈز میں اداکارہ ایلن ڈیجینریز کی ستاروں سے بھری سیلفی ہے۔ دوسری تصویر اس وقت کی ہے جب امریکی صدر براک اوبامہ نے نومبر 2012 میں دوبارہ امریکہ کے صدر منتخب ہونے پر ٹویٹ کی تھی۔ اس وقت یہ پلیٹ فارم کی سب سے زیادہ پسند کی جانے والی ٹویٹ تھی۔
نیلامی میں گٹار سے لے کر ڈرم کٹس اور ایمپلیفائر تک کے میوزیکل آلات کے علاوہ کنٹرولر، مکسر اور سپیکر کے ساتھ ڈی جے بوتھ بھی شامل ہے۔
یہ بولی 12 ستمبر کو شروع ہو گی اور دو دن بعد ختم کر دی جائے گی۔
ایلون مسک نے ٹوئٹر کو 44 ارب ڈالر میں خریدا تھا اور اس کے بعد اس کے اخراجات میں کمی کرنے کے لیے اقدامات کیے اور اب یہ نیلامی ہو رہی ہے۔
ٹویٹر خریدنے کے بعد ایلون مسک نے کپمنی میں ملازمتوں میں بڑی کٹوتی کی۔ ان کٹوتیوں میں ایسی ملازمتیں بھی تھیں جو پلیٹ فارم پر بدسلوکی کی نشاندہی کر کے روکتے تھے۔ کمپنی نے اکاؤنٹس کی تصدیق کرنے کا طریقہ بھی تبدیل کر دیا۔
اس سال کے شروع میں ٹوئٹر نے اپنے سان فرانسسکو ہیڈکوارٹر سے سینکڑوں اشیا کی نیلامی کی۔ اس کے مشہور چڑیا کے لوگو پر سب سے زیادہ بولی لگائی گئی اور وہ ایک لاکھ ڈالر میں فروخت ہوا۔
گذشتہ مہینے کمپنی نے اپنی برانڈنگ سے نیلی چڑیا کے لوگو کو ہٹا دیا اور اسے کالے اور سفید ’ایکس‘(X) سے تبدیل کر دیا تھا۔
ایکس نے جمعرات کو تبصرہ کے لیے بی بی سی کی درخواست کا فوری جواب نہیں دیا۔