خواتین مردوں کے پیسے کو دیکھتی ہیں اور پھر ۔۔ شہروز سبزواری نے خواتین سے متعلق ایسا کیا کہہ دیا کہ ان کے بیان پر تنقید کی جانے لگی؟

معروف اداکار شہروز سبزواری کے بیان نے پاکستان میں سمندری طوفان سے پہلے سوشل میڈیا پر تنقید کا طوفان برپا کردیا، سوشل میڈیا صارفین متنازعہ بیان پر بھڑک اٹھے۔

شہروز سبزواری نے اپنی فلم کے ساتھی اداکاروں کے ہمراہ ’فوشیا میگزین‘ کے شو میں بات چیت کرتے ہوئے کہا کہ بعض خواتین پیسے اور شہرت دیکھ کر مرد حضرات سے پیار کرلیتی ہیں جب کہ مرد ایسا نہیں کرتے۔

شہروز سبزواری کا کہنا تھا کہ کچھ خواتین پہلے مردوں کے پاس موجود بعض چیزوں کو دیکھتی ہیں، اس کے بعد ان سے شادی کرتی ہیں، جس کے بعد ہی ان کے ساتھ بہتر تعلقات بناتی ہیں۔انہوں نے واضح کیا کہ وہ تمام خواتین کی بات نہیں کر رہے، وہ بعض خواتین کی بات کر رہے ہیں۔

انہوں نے کہا کہ تمام خواتین ایسی نہیں ہوتیں لیکن بعض خواتین گھر اور دولت دیکھ کر مرد سے تعلقات استوار کرکے شادی کرلیتی ہیں، جس کے بعد ہی ان کے ساتھ وہ سمجھوتے کرکے بعض قربانیاں دیتی ہیں۔لیکن مرد ایسے نہیں کرتے، مرد پہلے قربانیاں دیتے ہیں، پھر محبت کرتے ہیں۔

شہروز سبزواری نے کہا کہ مرد جب خواتین سے محبت کر لیتے ہیں تو وہ اپنی ساتھی کے لیے قربانیاں بھی دے رہے ہوتے ہیں، ان کے لیے سمجھوتے بھی کر رہے ہوتے ہیں لیکن ایسا نہیں ہے کہ مرد صرف خواتین کی خوبصورتی کی وجہ سے ان کے لیے قربانیاں دیتے ہیں بلکہ وہ حقیقی محبت کی وجہ سے ایسا کرتے ہیں۔

شہروز سبزواری کے بیان کے بعد سوشل میڈیا صارفین نے صنفی کو جواز بناکر شدید تنقید کرتے ہوئے کہا کہ شہروز سبزواری نے خواتین کیلئے نامناسب الفاظ کا استعمال کیا ہے۔ بعض صارفین نے ان کے بیان کو سابقہ اہلیہ سائرہ سے بھی منسوب کیا ہے۔