پاکستانی کوہ پیماؤں نائلہ کیانی اور شہروز کاشف نے آٹھ ہزار میٹر بلند چوٹی سر کر لی

پاکستانی کوہ پیما نائلہ کیانی نے آٹھ ہزار میٹر سے بلند ایک اور چوٹی سر کر لی ہے۔ انہوں نے  پاکستانی کوہ پیما شہروز کاشف کے ساتھ ہی انا پورنا کو سمٹ کیا۔

نائلہ کیانی نے نیپال میں واقع آٹھ ہزار 91 میٹر بلند چوٹی انا پورنا کو اتوار کی صبح سر کیا۔ انا پورنا دنیا کی دسویں بلند ترین چوٹی ہے۔

وہ پاکستان کی واحد خاتون کوہ پیما ہیں جنہوں نے آٹھ ہزار میٹر سے بلند چار چوٹیاں سر کی ہیں۔ وہ اس سے قبل کے ٹو، گیشربرم ون اور گیشربرم ٹو سر کر چکی ہیں۔

پاکستان کے نوجوان کوہ پیما شہروز کاشف کے ٹوئٹر ہینڈل سے ٹویٹ کیا گیا کہ انہوں نے بھی اتوار کی صبح نیپال کی آٹھ ہزار میٹر سے بلند چوٹی انا پورنا کو سر کیا۔

وہ دنیا کی 14 میں سے 11 بلند ترین چوٹیاں سر کرنے والے کم عمر ترین کوہ پیما بن گئے ہیں۔ 

 کوہ پیماؤں کی چھ رکنی ٹیم میں دو پاکستانیوں کے ساتھ انڈیا کے ارجن واجپائی بھی شامل تھے۔

کوہ پیما نائلہ کیانی رواں سیزن میں ماؤنٹ ایوریسٹ اور لوٹسے بھی سر کریں گی۔