چیئرمین تحریک انصاف اور سابق وزیراعظم عمران خان کی نااہلی کا سبب بننے والے توشہ خانہ کیس کو منظر عام پر لانے والے صحافی رانا خالد ابرار نے عمران خان کو عدالت جانے کا مشورہ دیدیا۔
ہماری ویب سے خصوصی گفتگو کرتے ہوئے صحافی رانا خالدابرار نے بتایا کہ مجھے ذرائع سے معلوم ہوا کہ توشہ خانہ سے عمران خان نے تحائف لئے ہیں، یہ بھی پتا چلا کہ انہوں نے بہت کم پیسے دے کر تحائف لئے اور مہنگے بیچ دیئے ہیں۔
23 نومبر 2020 کو میں نے اسٹوری بریک کرنے کے بجائے معلومات کی درخواست کی،پاکستان انفارمیشن کمیشن سے اجازت ملنے کے باوجود مجھے توشہ خانہ کی تفصیلات نہیں دی گئیں۔توہین عدالت کی درخواست پر پی ٹی آئی حکومت نے ہائیکورٹ سے رجوع کرلیا۔
عدالت سے فیصلہ آنے کے بعد یہ خبر پوری دنیا میں پھیل گئی ،اس اسٹوری کی وجہ سے میرے خلاف انتقامی کارروائیاں بھی ہوئیں ،میری والدہ کو دھمکیاں دی گئیں لیکن میں ڈٹا رہا۔
توشہ خانہ کا معاملہ اٹھانے سے پہلے میں نے پوری ریسرچ کی،یوسف رضا گیلانی، نوازشریف اور آصف زرداری پر تو کیس چل رہے ہیں ،عمران خان کا معاملہ نظروں سے اوجھل تھا اس لئے اس پر کام کیا۔
ایک نجی ٹی وی پر عمران خان کے حق میں فیصلے کے حوالے سے پیش گوئی پر مجھے تشویش ہوئی،میں نے اپنے ذرائع سے رابطہ کیا تو انہوں نے مجھے ملنے کیلئے بلالیا،ذرائع نے مجھے کیس کی تفصیلات بتائیں ،جس پر میں نے عمران خان کیخلاف فیصلے سے متعلق ٹوئٹ کیا۔
اللہ کی رحمت ہے کہ میری پیش گوئی درست ثابت ہوئی ،عمران خان کو الیکشن کمیشن کے فیصلے کو تسلیم کرنا چاہیے ،فیصلے پر اعتراض ہے تو سپریم کورٹ میں چیلنج کردیں دودھ کا دودھ اور پانی کا پانی ہوجائے گا۔