پی ٹی آئی کے وائس چیئرمین شاہ محمود قریشی نے قومی اسمبلی کے حلقہ این اے 157سے بیٹے کی دستبرداری پر بیٹی کو ٹکٹ دیدیا جس پر پارٹی کارکنوں کی جانب سے شدید ناراضگی کا اظہار کیا گیا ہے۔
ملتان میں پی ٹی آئی کارکنوں کی جانب سے شاہ محمود قریشی کی بیٹی اور حلقہ این اے 157 سے پارٹی امیدوار مہر بانو قریشی کے خلاف احتجاج کیا گیا۔
ملتان میں پی ٹی آئی کارکن اپنی ہی پارٹی امیدوار مہر بانو قریشی کے خلاف الیکشن کمیشن آفس کے باہر احتجاجی مظاہرہ کرنے پہنچے اور موروثی سیاست نا منظور نامنظور کے نعرے لگائے۔
پی ٹی آئی کارکنوں کا کہنا ہے کہ تحریک انصاف نے موروثی سیاست کے خاتمے کی بات کی تھی، پی پی 217 ملتان میں بھی شاہ محمود نے اپنے بیٹے زین قریشی کو ٹکٹ دیا، این اے 157 میں بھی اپنی بیٹی کو ٹکٹ دے دیا۔
شاہ محمود قریشی کو اپنی بیٹی کے علاوہ کوئی امیدوار نظر نہیں آیا؟۔