پاکستان کی نامور اداکارہ بشریٰ انصاری اور مشہور ٹک ٹاک اسٹار کے درمیان ہونے والی لفظی گولا باری تاحال جاری ہے۔
اداکارہ نے جنت مرزا کے لباس کی وجہ سے انہیں تنقید کا نشانہ بنا کر ایک انسٹاگرام پوسٹ پر ایسے الفاظ کا استعمال کیا تھا کہ جس پر جنت مرزا اور ان کے ساتھی ٹک ٹاکر کی جانب سے جوابی رد عمل بھی سامنے آیا تھا اور بشریٰ انصاری سے معافی کا بھی مطالبہ کیا تھا۔
بعد میں بشریٰ انصاری کی پوسٹ پر جنت مرزا اور عمر بٹ نے سینئر اداکارہ بشریٰ انصاری کو سخت تنقید کا نشانہ بناتے ہوئے ان کے خلاف نامناسب الفاظ کا استعمال کرتے ہوئے انہیں ’جاہل عورت، اماں جی، آنٹی اور بزرگ‘ قرار دیا تھا۔
بشریٰ انصاری نے جنت مرزا کے خلاف اس وقت پوسٹ کی تھی، جب ٹک ٹاکر کی ایک مختصر ویڈیو وائرل ہوئی تھی، جس میں انہوں نے 'غیر دانستہ طور پر مسیحی افراد کے جذبات مجروح کیے تھے۔
اب اس سارے معاملے کے بعد اداکارہ بشریٰ انصاری کا ایک اور بیان سامنے آیا ہے جس میں انہوں جنت مرزا اور عمر بٹ کو تجویز پیش کرتے ہوئے کہا کہ نوجوان ٹک ٹاکرز بچوں کو بزرگ افراد کا احترام کرنا چاہیے، چاہے بزرگ افراد غلط ہی کیوں نہ ہوں۔
بشریٰ انصاری کا پوسٹ میں کہنا تھا کہ انہوں نے جنت مرزا کی ویڈیو اور ان کے خلاف مسیحیوں کے جذبات مجروح کرنے والے کمنٹس دیکھے تو انہوں نے بھی ٹک ٹاکر کے خلاف پوسٹ میں جواب دیا۔
مقبول اداکارہ کی جانب سے دعویٰ کیا گیا کہ وہ تو جنت مرزا کے نام تک سے واقف نہیں تھیں مگر بعد میں انہوں نے ان کی جانب سے مذکورہ معاملے پر معافی مانگے جانے کی پوسٹس دیکھیں تو اپنی پوسٹ ڈیلیٹ کر دی۔
بشریٰ انصاری کا کہنا تھا کہ وہ کسی کو اسلام کا درس نہیں دے رہیں، بس وہ یہ سمجھانا چاہتی ہیں کہ اسلام اقلیتوں کے حقوق کا درس دیتا ہے۔
ساتھ ہی انہوں نے جنت مرزا، علیشبہ انجم اور عمر بٹ کا نام لیے بغیر انہیں ہدایت دیتے ہوئے کہا کہ انہیں چاہیے کہ وہ بزرگ افراد کی عزت کریں اور بزرگوں کی جانب سے ڈانٹے جانے پر خاموشی اختیار کریں انہیں آگے سے جواب نہ دیں۔
بشریٰ انصاری کی اس پوسٹ پر سوشل میڈیا صارفین انہیں سراہ رہے ہیں۔