والد کا انتقال اچانک اس بیماری سے ہوا تھا ۔۔ سارہ خان اپنے والد کی وفات کا پہلی بار بتاتے ہوئے افسردہ ہوگئیں

پاکستانی میڈیا انڈسٹری سے تعلق رکھنے والی معروف اداکارہ سارہ خان نے پہلی بار اپنے والد کے انتقال کے بارے میں بتا دیا۔

پاکستانی اداکارہ سارہ خان نے انکشاف کیا کہ ان کے والد کا انتقال کورونا وائرس سے ہوا تھا۔

اداکارہ نے حال ہی میں نجی ٹی وی کے پروگرام میں شرکت کی اور دوران شو اپنے والد کے انتقال سے متعلق بات کی۔

اداکارہ کا کہنا تھا کہ وہ اور ان کے اہلخانہ بڑوں کے حوالے سے اب کافی محتاط ہیں یہی وجہ ہے کہ وہ اپنے سسرال والوں سے ملنے لاہور بھی نہیں جاسکی ہیں۔

دوران گفتگو اداکارہ نے انکشاف کیا کہ ان کے والد کا انتقال کورونا سے ہوا تھا، اور یہ وبا والد سے پورے اہل خانہ میں پھیل چکی تھی۔

انھوں نے کہا کہ والد چونکہ 70 سے زائد برس کے تھے لہٰذا کورونا ان پر شدت سے حملہ آور ہوا اور وہ 5 دن میں انتقال کرگئے۔

اداکارہ کا مزید کہنا تھا کہ فلک سمیت ہم سب بہن بھائیوں میں کورونا کی مختلف علامات تھیں، کسی کو جسم میں درد تھا تو کسی کو سر میں ، تاہم بھائی میں کورونا کی کوئی علامت ظاہر نہیں ہوئی تھی۔

سارہ خان کے مطابق کورونا مثبت آنے کے بعد ان کے سر میں شدید درد تھا جو کہ ناقابل برداشت تھا ، اور یہ سر درد کورونا سے صحتیابی کے دو ماہ بعد بھی موجود رہا۔

خیال رہے کہ گزشتہ برس کے آخری ایام میں اداکارہ سارہ خان کے والد انتقال کرگئے تھے۔ والد کی وفات کے بعد اداکارہ سارہ خان بہت انتہائی افسردہ ہوگئیں تھیں۔