کورونا وائرس کے حوالے سے ہم کافی قیاس آرائیاں سنتے آئے ہیں جبکہ اب امریکی انٹیلی جنس کمیونٹی کی جانب سے کورونا وائرس کی تخلیق کے سلسلے میں بڑا اعتراف کر لیا گیا ہے۔
غیر ملکی میڈیا کے مطابق امریکی انٹیلی جنس کمیونٹی نے اعتراف کیا ہے کہ کورونا وائرس مصنوعی طریقے سے تیار کردہ نہیں بلکہ قدرتی آفت ہے۔
امریکہ کے آفس آف دی ڈائریکٹر آف نیشنل انٹیلی جنس نے ایک بیان میں کہا ہے کہ کووڈ ١٩ کے حوالے سے وسیع سائنسی اتفاق رائے پایا جاتا ہے، یہ کمیونٹی بھی اس سے متفق ہے کہ کورونا وائرس جینیاتی ترمیم کا نتیجہ نہیں، نہ ہی یہ وائرس انسان نے بنایا ہے۔
اعلامیے میں بتایا گیا ہے کہ انٹیلی جنس کمیونٹی سامنے آنے والی خفیہ معلومات کا بھی باریک بینی سے جائزہ لے گی تاکہ یہ معلوم کیا جا سکے کہ کورونا کسی متاثرہ جانور سے پھیلا یا ووہان کی ایک لیبارٹری میں ایک حادثے کا نتیجہ تھا۔
یاد رہے کہ اس وائرس کے بارے میں پہلے خیال تھا کہ یہ ووہان میں جانوروں کی مارکیٹ سے پھیلا تاہم اب خیال ظاہر کیا جا رہا ہے کہ یہ ممکنہ طور پر قریبی وائرس ریسرچ لیبارٹری سے پھیلا۔