انسان سے بلی میں کورونا وائرس منتقل۔۔۔ کیا یہ ممکن ہے؟ ناقابلِ یقین انکشاف

یہ ایک عجیب بات ہے کہ انسان سے کسی جانور میں کوئی وائرس منتقل ہو گیا، لیکن ایسا ہوا۔

تفصیلات کے مطابق یورپی ملک بیلجیئم میں پہلا ایسا کیس سامنے آیا ہے جس میں ایک پالتو بلی میں یہ وائرس اس کی مالکن سے منتقل ہوگیا۔

اس خاتون میں کووڈ 19 کی تشخیص چند روز قبل اس وقت ہوئی تھی جب وہ شمالی اٹلی سے واپس آئی تھی تاہم چند دن بعد بلی میں بھی کورونا وائرس کی علامات ہیضہ، قے اور سانس کے مسائل سامنے آئے۔

مالکن نے قے اور فضلے کے نمونے تجزیے کے لیے ایک مقامی لیب کو بھجوائے جہاں جینیاتی ٹیسٹوں سے ان نمونوں میں نئے کورونا وائرس کی بہت زیادہ مقدار پائی گئی۔

بیلجیئم کی حکومت کے ترجمان اسٹیون وان گیسٹ نے بتایا کہ بلیوں اور انسانوں میں تنفس کے خلیات بظاہر ملتے جلتے لگتے ہیں جہاں سے یہ کورونا وائرس داخل ہوتے ہیں۔ انسانوں میں یہ وائرس ایک ریسیپٹر پروٹین ایس 2 سے جڑ جاتا ہے جو خلیات کے باہر موجود ہوتا ہے اور اس کی مدد سے خلیات میں داخل ہوکر مشینری پر کنٹرول کرکے اپنی تعداد بڑھانے لگتا ہے۔

ترجمان اسٹیون وان گیسٹ نے بتایا کہ یہ بلی 9 دن بعد صحت یاب بھی ہوگئی۔