امان اللہ کے ساتھ بڑا گہرا تعلق تھا، ان کی وفات کا سن کر بہت دکھ ہوا، انہوں نے اپنی بیماری میں بہت تکلیفیں اٹھائیں۔۔۔۔۔ بھارتی فنکاروں کا امان اللہ کے انتقال پر اظہارِ افسوس

بھارتی فنکاروں کی جانب سے کامیڈی کے بادشاہ امان اللہ کے انتقال پر گہرے دکھ کا اظہار کیا گیا۔

بالی ووڈ انڈسٹری کے مایہ ناز مزاحیہ اداکار جونی لیور نے ٹیلیفونک رابطے کے ذریعے بتایا کہ امان اللہ کی وفات پر انتہائی غمگین ہوں۔

ان کا کہنا تھا کہ میں ان کے مداحوں کے ساتھ سوگوار ہوں، امان اللہ کے ساتھ بہت گہرا تعلق تھا، انہوں نے اپنی بیماری میں بہت تکلیفیں اٹھائیں، امان اللہ اسٹینڈ اپ کامیڈی کے عمدہ فنکار تھے۔

جونی لیور کا مزید کہنا تھا کہ میری اکثر امان اللہ کے ساتھ ٹیلیفون پر بات ہوتی۔ انہوں نے جو اتنا بڑا کام کیا وہ کوئی سوچ بھی نہیں سکتا۔

بھارتی اداکار رضا مراد نے بھی امان اللہ کی وفات کو سب کے لئے سانحہ قرار دیا۔ اپنے ویڈیو پیغام میں ان کا کہنا تھا کہ امان اللہ بہت بڑے فنکار تھے، ان کے جانے سے کروڑوں مداح غمگین ہو گئے، بے شک زندگی اللہ تعالی کے ہاتھ میں ہے، مایوس چہرے بھی امان اللہ کو دیکھ کے مسکرا اٹھتے تھے آج وہ ہمیں روتا ہوا چھوڑ گئے۔