گزشتہ روز گلوکار علی عظمت نے ایک پروگرام میں شرکت کی جس میں انہوں نے علی ظفر کے گانے کی ویڈیو میں شامل ہونے کی خواہش ظاہر کی۔
علی عظمت کا کہنا تھا کہ 'میں اپنے ڈانس کی وڈیو علی ظفر کو بنا کر بھیجوں گا تاکہ وہ وڈیو اپنے گانے میں رکھیں'۔
علی عظمت نے کہا کہ 'گانے سے متعلق سارا تنازع بنایا گیا ہے، مجھے دکھ ہوا کہ علی ظفر کا گانا چلانے کی اجازت نہیں دی گئی'۔
گلوکار نے پی ایس ایل فائیو کے ترانے کے حوالے سے مزید کہا کہ 'پی سی بی کے آفیشلز نے بتایا، کچھ بلاگرز ہیں جو گانے پر تنقید کررہے ہیں لیکن میں یہ نہیں کہہ سکتا کہ اس مہم کے پیچھے علی ظفر ہیں یا نہیں۔ علی ظفر میرا دوست ہے، چھوٹے بھائیوں کی طرح ہے، میں تو کہتا ہوں علی ظفر 10 گانے اور بنائیں'۔
علی عظمت نے پروگرام میں اپنے مداحوں کو پیغام دیتے ہوئے کہا کہ 'ہمیں بطور قوم ہر اِس موقع پر بننے والے ہر گانے کی حوصلہ افزائی کرنی چاہیے، ہمیں ہر فنکار کے گانے کا خیر مقدم کرنا چاہیئے جو اپنے گانے کے ذریعے کرکٹ اور پاکستان سے اپنی محبت کا اظہار کرتے ہیں'۔