پاکستانی شوبز انڈسٹری کی معروف ماڈل و اداکارہ ایمان علی نے اپنی بیماری سے متعلق سب کو آگاہ کر دیا۔
ایمان علی کو 'ملٹی پل اسکلیروسز' ہے جو کہ ایک جان لیوا بیماری ہے۔ اداکارہ نے حوالے سے خود کو درپیش مشکلات کے بارے میں بتایا۔
سماجی رابطے کی ویب سائٹ انسٹاگرام پر اداکارہ نے 2 منٹ اور 3 سیکنڈ دورانیہ کی ایک ویڈیو شیئر کی۔ ویڈیو کے کیپشن میں ایمان علی نے ہیش ٹیگ 'انتظار نہ کرو' کا ہیش ٹیگ بھی استعمال کیا۔
ویڈیو کے آغاز میں ایمان علی نے بتایا کہ 'میں 2006 میں اپنے کیرئیر کے عروج پر تھی۔ ہر میگزین کے کور پیج پر میری تصویر ہوتی تھی۔ ایسے میں شعیب منصور کی فلم کی آفر آجانا غرض کہ سب کچھ بہترین چل رہا تھا کہ ایسے میں ملٹی پل اسکلیروسز جیسی جان لیوا بیماری کی تشخیص ہوئی'۔
اداکارہ نے بتایا کہ 'اُس وقت یہ میری زندگی کا سب سے بڑا چیلنج بن گیا۔ لوگوں کو اس بارے میں پتہ ہی نہیں ہے کہ ملٹی پل اسکلیروسز میں ہوتا کیا ہے؟ اس کے ساتھ زندگی گزارنا کتنا اذیت ناک ہے'۔
اداکارہ نے بیماری کی علامات پر روشنی ڈالتے ہوئے کہا کہ 'اسکرپٹ پڑھتے ہوئے اچانک دھندلا نظر آنا۔ آٹھ گھنٹے سونے کے باوجود تھکن دور نہیں ہوتی۔ ہر وقت بس ایک ہی ڈر لگا رہتا ہے کہ آج کا دن کیسا گزرے گا؟'
ایمان علی نے شکوہ کرتے ہوئے کہا کہ 'افسوس اس چیز کا ہے کہ کبھی کسی نے اس بات کا اعتراف ہی نہیں کیا کہ میں نے اتنی تکالیف جھیلنے کے بعد بھی ہمت نہیں ہاری۔ کام کرتی رہی اور شادی بھی کرلی'۔
اداکارہ و ماڈل نے اپنے چاہنے والوں کو مشورہ دیا کہ 'اپنا خیال رکھیں کوئی بھی علامت ظاہر ہو تو اسے نظر انداز کرنے کے بجائے فوراً نیورولوجسٹ سے رابطہ کریں۔ تشخیص کے فوری بعد معالج سے رابطہ آپ کو زندگی بھر کی معذوری سے بچا سکتا ہے'۔