پاکستان کے لیجنڈری اداکار اور چھوٹی اسکرین کے بڑے اور بے مثال فنکار قاضی واجد کو اپنے چاہنے والوں سے بچھڑے تین برس بیت گئے۔
قاضی واجد 26 مئی 1930 کو شہر لاہور میں پیدا ہوئے ، انہوں نے اپنے کیریئر کی ابتداء سنہ 1956 میں ریڈیو پر چائلڈ صداکار کی حیثیت سے کی تھی۔ اُن کے پروگرام ’قاضی جی کا قاعدہ‘ نے ان دنوں غیر معمولی مقبولیت کی حاصل تھی۔
اداکار قاضی واجد نے سو سے زائد مختلف ڈراموں اور ڈرامہ سیریل میں اپنی اداکاری کے جوہر دکھائے ۔ ’خدا کی بستی‘ ٹیلی ویژن پر اُن کی پہلی کارکردگی تھی جس میں ’راجہ‘ ان کی شناخت بھی بن گیا۔
ان کے بہترین ڈرامے دھوپ کنارے ،تنہائیاں، کرن کہانی، ہوائیں، حوا کی بیٹی نے ٹی وی اسکرین پر بہت مقبولیت حاصل کی ۔
قاضی واجد کو ان کی فنی خدمات کے اعتراف میں سال 1988 میں حکومت کی جانب سے پرائڈ آف پرفارمنس کے اعزاز سے بھی نوازا گیا تھا ، اس کے علاوہ انہیں 12 ویں سرکاری ٹیلی وژن ایوارڈ میں بہترین اداکار کے طور پر ایوارڈ دیا گیا۔
وہ بیرون ممالک میں مختلف شہروں میں جا کر اسٹیج ڈراموں میں بھی پرفارم کر چکے ہیں۔
خیال رہے کہ قاضی واجد 11 فروری 2017ء کو 87 سال کی عمر میں دل کا دورہ پڑنے کے باعث دنیائے فانی سے رخصت ہو گئے تھے۔