سماعت سے محروم طلباء و طالبات کے نویں و دسویں کے سالانہ امتحانات

ثانوی تعلیمی بورڈ کراچی کے ناظم امتحانات نعمان احسن کے اعلامیہ کے مطابق خصوصی طلباء طالبات کے نویں و دسویں جماعت کے سالانہ امتحانات برائے سال ۲۰۱۵؁ بروز بد ھ ۶ مئی سے ۲۳ مئی تک منعقد ہونگے۔ ان امتحانات میں رجسٹرڈ طلباء و طالبات کی تعداد ۱۹۰ ہے۔ ایڈمٹ کارڈ بروز ہفتہ ۲ مئی کو بورڈ ہذا سے اسکولوں کو جاری کئے جائیں گے۔ ان امتحانات کے لئے تمام امیدواروں کا امتحانی مرکز گورنمنٹ پائلٹ گرلز ہائر سیکنڈری اسکول ناظم آباد نمبر ۳مقرر کیا گیاہے۔ یہ امتحانات صبح کی شفٹ میں صبح ۹ بجے سے ۱۲ بجے دوپہر تک منعقد ہونگے۔ امتحانی مرکز پر پرچہ جات کی بروقت ترسیل کے لئے سینٹر کنٹرول آفیسر (C.C.O.)کا تقرر کردیا گیا ہے جو پرچہ جات شروع ہونے سے لیکر اختتام تک اپنی ذمہ داریاں سینٹر پر ہی انجام دیں گے۔ ان خصوصی طلباء و طالبات کیلئے امتحانی مرکز پر تمام ممکنہ سہولیات فراہم کردی گئی ہیں تاکہ یہ طلباء و طالبات مکمل یکسوئی کے ساتھ اپنا امتحان دے سکیں۔