بینظیر بھٹو شہید یونیورسٹی لیاری کے فائنل سمسٹر کے نتائج کا اعلان

بے نظیر بھٹو شہید یونیورسٹی لیاری کراچی نے فائنل سمسٹر امتحانات کے نتائج کا اعلان کر دیا ہے اس سلسلے میں کامیاب طلبا ء جن کی حاضری 80؍ فی صد سے زیادہ اور جنہوں نے تما م مضامین میں کامیابی حاصل کی ہے، ان کو وظائف دینے کا اعلان کیا ہے، یونیورسٹی کے تین بیجز کے 436؍ طلبا ء میں سے 224؍ طلبا ء کو وظائف کا مستحق قرار دیا گیا ہے، یاد رہے کہ یونیورسٹی کے کامیاب طلبا ء کو پچھلے تین سالوں سے ہر سمسٹر میں وظائف دینے کا سلسلہ جاری ہے جس کے نتیجے میں نہ صرف طلبا ء کے درمیان مقابلے کا رجحان بڑھ رہا ہے بلکہ ان کو تعلیمی اخراجات میں بھی معاونت مل رہی ہے، حال ہی میں یونیورسٹی کے 131؍ طلبا ء کو زکوٰۃ و عشر کمیٹی کراچی کی جانب سے میرٹ اسکالر شپ صوبائی وزیر تعلیم نثار احمد کھوڑو نے ایک تقریب میں تقسیم کی، بے نظیر بھٹو شہید یونیورسٹی لیاری کراچی کے وائس چانسلر رشید احمد شاہ اور ڈین ڈاکٹر عبدالحسین شاہ بخاری نے کامیاب طلبا ء کو مبارکباد دیتے ہوئے اس امید کا اظہار کیا ہے کہ وہ زیادہ سے زیادہ محنت کر کے بہترین نتائج حاصل کرنے کی مزید کوشش کریں گے اور ملک و قوم کی خدمت کرنے کے ساتھ ساتھ لیاری کا نام بھی روشن کریں گے۔