Getty Images
انگلینڈ کرکٹ ٹیم کے کپتان بین سٹوکس نے اعتراف کیا ہے کہ وہ انگلینڈ کے کپتان کے طور پر اپنے ’سب سے مشکل وقت‘ سے گزر رہے ہیں۔ اُن کا کہنا ہے کہ یہ وقت ہے کہ انگلش کرکٹ ٹیم کے کھلاڑیوں کے ساتھ ہمدردی کا اظہار کیا جائے۔
بین سٹوکس کا یہ بیان ایسے وقت میں سامنے آیا، جب انگلینڈ کو ایشیز سیریز میں تین، صفر سے خسارے کا سامنا ہے اور بعض کرکٹ ماہرین اس خدشے کا اظہار کر رہے ہیں کہ اگر انگلش ٹیم نے اپنی کارکردگی بہتر نہ بنائی تو اسے پانچ میچز کی سیریز میں کلین سویپ کا سامنا کرنا پڑ سکتا ہے۔
سیریز میں شکست کے ساتھ ساتھ کھلاڑیوں کی جانب سے حد سے زیادہ شراب نوشی کی رپورٹس نے بھی ٹیم کے جذبے پر منفی اثر ڈالا۔
چند روز سے اوپنر بین ڈکٹ کی ایک ویڈیو بھی وائرل ہو رہی ہے، جس میں بظاہر وہ زیادہ شراب نوشی کی وجہ سے تنقید کی زد میں ہیں۔
انگلش کرکٹ بورڈ کے ڈائریکٹر نے اس معاملے کی تحقیقات کا اعلان کر رکھا ہے۔
ڈائریکٹر روب کی نے ایک بیان میں کہا کہ وہ ساحلی شہر نوسا میں دوسرے اور تیسرے ٹیسٹ کے درمیان سیریز سے وقفے کے دوران کھلاڑیوں کے رویے کی تحقیقات کریں گے۔
بی بی سی اس ویڈیو کی تصدیق نہیں کر سکا جبکہ انگلینڈ اور ویلز کرکٹ بورڈ نے کہا ہے کہ وہ ’حقائق سامنے لائے گا۔‘
بین سٹوکس نے بی بی سی سپورٹس کو بتایا کہ ’میں اس مشکل وقت سے بھاگنے والا نہیں ہوں، میں باقی میچز میں ٹیم کی بھرپور رہنمائی کروں گا۔ میں لڑکوں کو اس مشکل وقت سے گزرنے میں مدد دُوں گا۔‘
انگلینڈ اور آسٹریلیا کے درمیان باکسنگ ڈے ٹیسٹ 26 دسمبر سے میلبرن کرکٹ گراؤنڈ میں شروع ہو رہا ہے۔
Getty Images
اپنی ٹیم کے کھلاڑیوں سے متعلق تحقیقات کے بارے میں پوچھے جانے والے سوال کے جواب میں بین سٹوکس کا کہنا تھا کہ ہماری ٹیم میں بہت سے ایسے کھلاڑی ہیں، جو تینوں فارمیٹ کھیلتے ہیں اور گھر سے باہر بہت زیادہ وقت گزارتے ہیں۔
اُن کا کہنا تھا کہ یہ بہت مشکل ہوتا ہے کہ آپ ہر وقت سفر میں رہتے ہیں۔
بین سٹوکس کا کہنا تھا کہ مجھے معلوم ہے کہ لوگوں کے پاس ہمیں کہنے کے لیے بہت کچھ ہے۔ ’ہمیں اپنے گھر سے دُور رہنے کے ساتھ ساتھ کڑی نگرانی کا بھی سامنا رہتا ہے اور خاص طور پر جب چیزیں آپ کے حق میں نہ جا رہی ہوں تو صورتحال مزید پیچیدہ ہو جاتی ہے۔‘
سابق کرکٹرز کیا کہتے ہیں؟
ٹیلی گراف کے لیے اپنے کالم میں انگلینڈ کے سابق کپتان مائیکل وان نے انگلش کھلاڑیوں کا دفاع کرتے ہوئے لکھا کہ ایسا نہیں ہو سکتا کہ آپ ٹیسٹ میچز کے درمیان کھلاڑیوں کو باہر نکلنے اور ہلکی پھلکی تفریح کا موقع نہ دیں۔
سابق انگلش کپتان کا مزید کہنا تھا کہ جب میں انگلینڈ کے لیے کھیل رہا تو میں بھی ایسا ہی کرتا تھا لیکن مجھے اس بات کا بھی ادراک تھا کہ کب واپس گھر جانا ہے اور شاید بین ڈکٹ کو یہ چیز سیکھنے کی ضرورت ہے۔
اُن کا کہنا تھا کہ ہمیں کسی کے بارے میں فوری رائے قائم نہیں کرنی چاہیے۔ ’ہمیں یہ دیکھنا چاہیے کہ ڈائریکٹر روب کے فیصلوں، برینڈن مکولم کی کوچنگ اور بین سٹوکس کی کپتانی سے ٹیم کو کتنا فائدہ ہوا۔‘
ویبھو سوریاونشی: 50 اوورز میں 574 سکور اور 14 سالہ بلے باز کا نیا ریکارڈٹی 20 کرکٹ میں کم سکور کا نیا ریکارڈ: 10 رن پر پوری ٹیم آؤٹ پھر دو گیندوں پر دو چھکے اور میچ ختم’ملتان بوائے نے پاکستان کے لیے کر دکھایا:‘ انڈر 19 ایشیا کپ فائنل میں انڈیا کے خلاف 172 رنز بنانے والے سمیر منہاس کون ہیں؟ون ڈے کی پہلی ڈبل سنچری سمیت کرکٹ کے وہ ریکارڈ جو خواتین نے مردوں سے پہلے بنائے
مائیکل وان کے مطابق اسی طرح کھلاڑیوں کے بارے میں ہمیں یہ دیکھنا چاہیے کہ سیریز کے اختتام پر اُنھوں نے کتنے رنز بنائے اور کتنی وکٹیں لیں۔
وان کا کہنا تھا کہ وہ نہیں سمجھتے کہ بین ڈکٹ کو سامنے آنے والے شواہد کی بنا پر سزا دی جائے۔ ’یہ ایک وسیع معاملہ ہے۔ کرکٹ کے کھیل کے دوران شراب نوشی کا یہ کوئی پہلا معاملہ نہیں۔‘
سنہ 2022 میں انگلینڈ کی کپتانی سنبھالنے والے بین سٹوکس نے اپنے ساتھ پیش آنے والے واقعے اور مشکل وقت کا بھی تذکرہ کیا، جس نے اُنھیں سنہ 2018-2017 کے ایشز ٹوور سے باہر کر دیا گیا تھا۔
برسٹل نائٹ کلب کے باہر اُن پر جھگڑا کرنے کا الزام عائد کیا گیا تاہم تحقیقات کے بعد اُنھیں ان الزامات سے بری کر دیا گیا تھا۔
سٹوکس نے اپنی ذہنی صحت کو ترجیح دینے کے لیے 2021 کے موسم گرما میں کرکٹ سے پانچ ماہ کا وقفہ بھی لیا تھا۔
انگلش ٹیم کے نوسا ساحل کے دورے پر تنقید
آسٹریلیا میں نیو ساؤتھ ویلز کے ناسا ساحل کا شمار دُنیا کے خوبصورت ساحلوں میں ہوتا ہے۔ یہ جگہ اپنے قدرتی حسن، نیشنل پارک اور دیگر تفریحی سرگرمیوں کی وجہ سے جانی جاتی ہے۔
لیکن آسٹریلیا سے دو میچ ہارنے کے بعد انگلش ٹیم کے اس جگہ کے دورے پر بھی مداح تنقید کر رہے ہیں۔
اطلاعات کے مطابق انگلش ٹیم کا نوسا کا دورہ ایشز ٹوور سے ایک سال پہلے ترتیب دیا گیا تھا اور دو ٹیسٹ میچز میں شکست کے باوجود اسے منسوخ نہیں کیا گیا۔
انگلینڈ کے سکواڈ نے کوئنز لینڈ کے ساحل پر چار راتیں گزاریں۔ بی بی سی سمیت متعدد ذرائع ابلاغ نے رپورٹ کیا تھا کہ کچھ کھلاڑیوں نے اس دورے کے بیشتر حصے میں شراب نوشی کی جبکہ برسبین ٹیسٹ سے قبل بھی کھلاڑی شراب نوشی کرتے رہے۔
سٹوکس کہتے ہیں کہ ’جب آپ جیت رہے ہوتے ہیں تو کوئی آپ پر اُنگلی نہیں اُتھاتا لیکن جب آپ سیریز میں تین، صفر سے پیچھے ہوں تو پھر آپ جو کچھ بھی کرتے ہیں، اس پر تنقید ہوتی ہے۔‘
Getty Imagesباکسنگ ڈے ٹیسٹ کا امتحان
ان تمام تنازعات اور تنقید کے بعد انگلینڈ کی ٹیم جمعے کو باکسنگ ڈے ٹیسٹ میں ایک بار پھر آسٹریلیا کے مدمقابل ہو گی۔
میلبرن میں ایک لاکھ سے زائد تماشائیوں کی متوقع آمد کے پیشِ نظر انگلش ٹیم کو بہتر کارکردگی دکھانے کا چیلنج بھی درپیش ہو گا۔
دونوں ٹیموں کی جانب سے ٹیم میں تبدیلیوں کا امکان ہے۔ آسٹریلوی کپتان، پیٹ کمنز نے آخری دو ٹیسٹ میچز کے لیے خود کو دستبردار کر لیا ہے۔
سٹیو سمتھ، پیٹ کمنز کی جگہ ٹیم کی قیادت کریں گے۔ آسٹریلیا کی جانب سے میلبرن کی پچ پر چار تیز بولر آزمانے کا امکان ہے۔
دوسری جانب شراب نوشی کا تنازع سامنے آنے کے باوجود کرکٹ ویب سائٹ کرک انفو کے مطابق بین ڈکٹ انگلش الیون میں شامل رہیں گے جبکہ ناقص کارکردگی دکھانے والے اولی پوپ کی جگہ جیکب بیتھیل کو موقع دیا جائے گا۔
فاسٹ بولر جوفرا آرچر پہلے ہی انجری کی وجہ سے باقی ٹوور کے لیے باہر ہو چکے ہیں۔ اُن کی جگہ گس اٹیکنسن ٹیم میں شامل ہوں گے۔
خیال رہے کہ پرتھ، برسبین اور ایڈیلیڈ میں کھیلے جانے والے تینوں ٹیسٹ میچز میں آسٹریلیا نے باآسانی انگلینڈ کو شکست دے دی تھی۔
سیریز کا چوتھا ٹیسٹ میچ جمعے کو میلبرن میں شروع ہو رہا ہے جبکہ آخری اور پانچواں ٹیست میچ سڈنی میں کھیلا جائے گا۔
گیند بلے سے لگنے کے باوجود آسٹریلوی بیٹر کو ریویو میں ناٹ آؤٹ دیے جانے پر تنازعجب ایک بیٹسمین کی وجہ سے کرکٹ بیٹ کے قوانین بدلنے پڑے’خوف زدہ کر دینے کی حد تک‘ تیز بولر جنھیں شعیب اختر جیسی شہرت نہ مل سکیدبئی میں نوکری چھوڑنے کے بعد پاکستانی ٹیم کا حصہ بننے والے عثمان طارق اور ان کے غیر معمولی بولنگ ایکشن کی کہانیویبھو سوریاونشی: 50 اوورز میں 574 سکور اور 14 سالہ بلے باز کا نیا ریکارڈکوہلی کی 49 سنچریوں کا ریکارڈ: جب سچن تندولکر نے خود کہا کہ ویراٹ ان کا ریکارڈ توڑیں گے