Getty Imagesعارف حبیب نے کہا ہے کہ ’آج پاکستان کی جیت ہوئی ہے‘
ریئل اسٹیٹ، سیمنٹ مینوفیکچرر، بروکریج ہاؤس اور سکول۔۔۔ مختلف شعبوں سے تعلق رکھنے والی کئی کمپنیوں نے پاکستان کی قومی ایئر لائن پی آئی اے خریدنے میں دلچسپی ظاہر کی مگر حتمی طور پر سب سے بڑی بولی عارف حبیب کنسورشیئم کی طرف سے 135 ارب روپے کی لگائی گئی۔
پی آئی اے کی خریداری کے لیے جن دو گروپس نے 100 ارب روپے سے زیادہ کی بولیاں دیں ان میں لکی اور عارف حبیب گروپس اور ان کی ساتھی کمپنیوں پر متشمل کنسورشیئمز شامل تھے۔
منگل کو جب بولیاں کھولنے کی تقریب شروع ہوئی تو سب سے پہلے لکی گروپ کی جانب سے دی گئی بولی کھولی گئی۔ اس گروپ نے پی آئی اے خریدنے کے لیے 101.5 ارب روپے کی بولی دی تھی۔ ایئر بلیو نے 26.5 ارب روپے کی بولی جمع کرائی۔ جبکہ تیسری اور آخری بولی عارف حبیب گروپ اور ان کی ساتھی کمپنیوں کی تھی جو سب سے زیادہ 115 ارب روپے کی تھی۔
تاہم پھر اوپن بڈنگ کے مرحلے میں عارف حبیب کنسورشیئم نے 135 ارب روپے کی پیشکش کے ساتھ بولی کا عمل جیت لیا۔
ملک کی معروف کاروباری شخصیت عارف حبیب نے میڈیا سے گفتگو کرتے ہوئے کہا کہ ’پی آئی اے ہمارا قومی ادارہ ہے اور اس سے بہت اچھے دن دیکھے ہیں۔ یہ دنیا میں دوسرے نمبر پر (بہترین) ایئر لائن ہے۔‘
’اس کے تمام ملازمین اہل ہیں اور کام کو اچھے سے جانتے ہیں۔‘
عارف حبیب نے مزید کہا کہ ’آج پاکستان کی جیت ہوئی ہے۔‘
خیال رہے کہ حکومت پاکستان کی جانب سے پی آئی اے کی فروخت کے لیے کم سے کم قیمت 100 ارب روپے مقرر کی گئی تھی۔ اس سے قبل پی آئی اے کی نجکاری کی کوشش کے دوران بلیو ورلڈ سٹی نامی ریئل اسٹیٹ کمپنی نے 10 ارب روپے میں قومی ایئر لائن خریدنے کی پیشکش کی تھی جسے ریزرو پرائس سے کافی کم ہونے پر مسترد کر دیا گیا تھا۔
Reutersعارف عارف حبیب لمیٹڈ پاکستان کی بڑی سکیورٹیز بروکریج، انویسٹمنٹ بینکنگ اور ریسرچ فرم ہےعارف حبیب کنسورشیئم کیا ہے؟
عارف حبیب کنسورشیئم میں بروکریج ہاؤس عارف حبیب لمیٹڈ، فاطمہ فرٹیلائزر، سٹی سکول اور لیک سٹی ہولڈنگز شامل ہیں۔
عارف عارف حبیب لمیٹڈ پاکستان کی بڑی سکیورٹیز بروکریج، انویسٹمنٹ بینکنگ اور ریسرچ فرم ہے۔ یہ کمپنی پاکستان سٹاک ایکسچینج میں لسٹڈ ہے۔ یہ کمپنی کی ویب سائٹ پر دی گئی معلومات کے مطابق واحد بروکریج فرم ہے جو پاکستان سٹاک ایکسچینج کی ٹاپ 25 کمپنیوں میں شامل ہے۔
فاطمہ فرٹیلائزر پاکستان میں کھاد بنانے والی کمپنی ہے جو 2003 میں فاطمہ گروپ اور عارف حبیب گروپ کے مابین ایک مشترکہ منصوبے کے طور پر قائم کی گئی۔ کمپنی سرسبز اور ببر شیر جیسے برانڈز کے تحت یوریا سمیت دیگر کھادیں تیار کرتی ہے۔
سٹی سکول 1978 میں قائم ہوا اور دنیا بھر اس کی 500 برانچیں ہیں جن میں ڈیڑھ لاکھ سے زیادہ طلبہ زیر تعلیم ہیں۔ لیک سٹی پاکستان ایک رئیل اسٹیٹ کمپنی ہے۔ لیک سٹی لاہور کے مضافات میں ریزورٹ/رہائشی ترقیاتی منصوبہ ہے۔
عارف حبیب نے عارف حبیب کارپوریشن لمیٹڈ قائم کی تھی اور وہ فی الحال اس کے چیئرمین ہیں۔ وہ فاطمہ فرٹیلائزر کمپنی لمیٹڈ کے بھی چیئرمین ہیں۔
عارف حبیب ماضی میں کراچی سٹاک ایکسچینج کے صدر/چیئرمین کے طور پر چھ مرتبہ منتخب ہو چکے ہیں اور وہ سینٹرل ڈیپازٹری کمپنی آف پاکستان لمیٹڈ کے بانی ممبر اور چیئرمین بھی رہے ہیں۔
وہ ماضی میں پرائیویٹائزیشن کمیشن، بورڈ آف انویسٹمنٹ، ٹیرف ریفارمز کمیشن اور سیکیورٹیز اینڈ ایکسچینج آرڈیننس ریویو کمیٹی کے رکن کے طور پر کام کر چکے ہیں۔
لکی گروپ کا کنسورشیئم
لکی گروپ کا کنسورشیئم لکی سیمنٹ، حب پاور، کوہاٹ سیمنٹ اور میٹرو وینچرز پر مشتمل ہے۔
لکی سیمنٹ یونس برادرز گروپ کی کمپنی ہے جو پاکستان سٹاک ایکسچینج پر لسٹڈ کمپنی ہے جس کے بورڈ آف ڈائریکٹرز میں ملک کے معروف خاندان ٹبہ کے افراد کی اکثریت ہے۔
حب پاور کمپنی لمیٹڈ پاکستان سٹاک ایکسچینج پر لسٹڈ کمپنی ہے۔کمپنی کا بلوچستان کے علاقے حب میں واقع 1,200 میگاواٹ (نیٹ) صلاحیت کا تیل سے چلنے والا بجلی گھر ہے۔
ایک سال پہلے اربوں روپے خسارے والی پی آئی اے منافع بخش کیسے بن گئی؟ایک اور فضائی میزبان ٹورونٹو میں ’غائب‘: پی آئی اے کا عملہ کینیڈا پہنچ کر ہی کیوں ’غائب‘ ہوتا ہے؟انڈیا میں ’پی آئی اے‘ اور ’آئی لو پاکستان‘ کی تحریر والے پراسرار غبارے: ’یہ کہاں سے آ رہے ہیں؟‘پی آئی اے کا اکتوبر میں برطانیہ کی پروازیں شروع کرنے کا اعلان لیکن 5 سال میں قومی ایئر لائن کو کتنے ارب کا نقصان ہوا؟
کوہاٹ سیمنٹ کمپنی لمیٹڈ کو 1984 میں سٹیٹ سیمنٹ کارپوریشن آف پاکستان نے قائم کیا۔ 1992 میں حکومت نے اس کمپنی کی نجکاری کر دی۔
کمپنی کو 1984 میں پاکستان کی اسٹاک ایکسچینج میں لسٹ کیا گیا۔ کمپنی کی بنیادی سرگرمی سیمنٹ کی تیاری اور فروخت ہے، جس میں گرے اور وائٹ کلنکر شامل ہیں۔
میٹرو وینچرز کیش اینڈ کیری اور توانائی کے شعبوں کی کمپنیوں پر مشتمل گروپ ہے۔
محمد علی ٹبہ لکی سیمنٹ کے چیف ایگزیکٹیو ہیں۔ انھوں نے یہ ذمہ داری 2005 سے سنبھالی ہوئی ہے۔ اس کے علاوہ وہ یونس ٹیکسٹائل ملز لمیٹڈ کے چیف ایگزیکٹو آفیسر بھی ہیں۔
محمد علی ٹبہ اس وقت عزیز ٹبہ فاؤنڈیشن کے وائس چیئرمین بھی ہیں جو سماجی شعبے میں کام کرتی ہے۔
ایئر بلیو کی سب سے کم بولی
ایئر بلیو لمیٹڈ ایک نجی ایئر لائن ہے۔ کمپنی کی ویب سائٹ پر موجود معلومات کے مطابق یہ پاکستان کی دوسری بڑی ایئر لائن ہے اور ملکی فضائی منڈی میں اس کا حصہ مسلسل بڑھ رہا ہے۔
ایئر بلیو کے فضائی بیڑے میں ایئربس اے 320 اور اے 321 طیارے شامل ہیں۔
کمپنی کے شیئر ہولڈنگ ڈھانچے میں مختلف سرمایہ کاروں کا ایک گروپ شامل ہے۔ طارق چوہدری کمپنی کے چیف ایگزیکٹو آفیسر (سی ای او) اور چیئرمین بورڈ کے طور پر کام کر رہے ہیں۔
ایئر بلیو اندرونِ ملک اسلام آباد، لاہور، کراچی، پشاور اور ملتان کو بین الاقوامی مقامات سے جوڑنے والی شیڈول پروازیں چلاتی ہے، جن میں متحدہ عرب امارات کے ہوائی اڈے دبئی، شارجہ اور ابوظہبی، اور مملکتِ سعودی عرب کے ہوائی اڈے جدہ اور ریاض شامل ہیں۔
پی آئی اے کی نجکاری کی ایک اور کوشش: عارف حبیب کنسورشیئم 115 ارب روپے کی بولی کے ساتھ سرِفہرستانڈیا میں ’پی آئی اے‘ اور ’آئی لو پاکستان‘ کی تحریر والے پراسرار غبارے: ’یہ کہاں سے آ رہے ہیں؟‘پی آئی اے کا اکتوبر میں برطانیہ کی پروازیں شروع کرنے کا اعلان لیکن 5 سال میں قومی ایئر لائن کو کتنے ارب کا نقصان ہوا؟ایک سال پہلے اربوں روپے خسارے والی پی آئی اے منافع بخش کیسے بن گئی؟ایک اور فضائی میزبان ٹورونٹو میں ’غائب‘: پی آئی اے کا عملہ کینیڈا پہنچ کر ہی کیوں ’غائب‘ ہوتا ہے؟