میچ ہو پاکستان اور انڈین کرکٹ ٹیموں کا تو گزشتہ ریکارڈ دیکھتے ہوئے اکثر پاکستانیوں کے دل کو ایک دھڑکا سا ہی لگا رہتا ہے کہ نجانے آج کیا ہو گا مگر اتوار کے روز معاملات مختلف دیکھائی دیے۔
دبئی میں ایشین کرکٹ کونسل انڈر 19 ایشیا کپ کے فائنل میں پاکستان نے انڈیا کو انتہائی شاندار پرفارمنس کے بعد 191 رنز سے شکست دے دی۔
انڈیا نے اس فائنل میچ میں ٹاس جیت کر فیلڈنگ کا فیصلہ کیا اور پاکستان کے لیے یہ فیصلہ اس صورت میں بہتر ثابت ہوا کہ اس نے پہلے بیٹنگ کرتے ہوئے انڈیا کو جیتنے کے لیے 348 رنز کا بڑا ہدف دے دیا۔
پاکستان نے مقررہ 50 اوورز میں آٹھ وکٹوں کے نقصان پر 347 رنز بنائے۔
پاکستان کی جانب سے اوپنر سمیر منہاس نے انتہائی شاندار بیٹنگ کا مظاہرہ کیا اور 17 چوکے اور نو چھکوں کی مدد سے 113 گیندوں پر 172 رنز کی اننگز کھیلی۔
سمیر منہاس نے اپنی سنچری محض 71 گیندوں پر بنائی۔
واضح رہے کہ پاکستانی اوپنر سمیر منہاس اس ٹورنامنٹ کے ٹاپ سکورر بھی رہے ہیں۔
پاکستان کی جانب سے سمیر کے علاوہ سب سے زیادہ سکور احمد حسین نے 72 گیندوں پر 56 رنز بنائے۔
پاکستان کی جانب سے عثمان خان نے 35،کپتان فرحان یوسف نے 19 اور حمزہ ظہور نے 18رنز بنائے۔ محمد صیام 13 اور نقاب شفیق 12 رنز کے ساتھ ناٹ آؤٹ رہے۔
پاکستان کی پہلی وکٹ 31 رنز کے مجموعی سکور پر چوتھے اوور میں گری جب اوپنر حمزہ ظہور ہنیل پٹیل کے ہاتھوں صرف 18 رنز بنانے کے بعد پویلین لوٹ گئے۔
اس کے بعد پاکستانی اوپنر سمیر منہاس کا ساتھ دینے کے لیے عثمان خان کریز پر آئے اور ایک اینڈ کو 17ویں اوور تک سنبھالے رکھا تاہم اسی دوران دوسرے اینڈ سے سمیر منہاس نے اپنا جارہانہ کھیل جاری رکھا۔
17ویں اوور میں عثمان کو کھیلان پٹیل نے آوٹ کر دیا۔ انڈیا کی جانب سے دپیش دیوندرن نے تین، کھیلان پٹیل اور ہینل پٹیل نے دو دو کھلاڑیوں کو آؤٹ کیا۔
خیال رہے کہ پاکستان 2 بار آئی سی سی انڈر 19ورلڈ کپ کا ٹائٹل جیت چکا ہے لیکن اب تک انڈر 19 ایشیا کپ کا فاتح نہیں بنا تھا۔
لمبی اننگز کھیلنے کے شوقین سمیر منہاس کون ہیں؟سیاسی اشارے اور متنازع فیصلے: پاکستان اور انڈیا کے درمیان کرکٹ میچ تعلقات میں بہتری کے بجائے ’جنگ کا تسلسل‘ کیسے بنے؟آئی پی ایل کی نیلامی میں کرکٹرز کے لیے کروڑوں روپے کی بولیاں: ’اب پی ایس ایل کو بھی کچھ نیا کرنا ہوگا‘پاکستان کی تاریخکا ’سب سے عظیم‘ کرکٹر کون ہے؟کرفیو میں پاکستانی ٹیم کی ٹریننگ، تمل ٹائیگرز کا خوف اور رانا ٹنگا کے آنسو: نوے کی دہائی کی یادیں اور ’وہ قرض جو سری لنکا آج چُکا رہا ہے‘
پاکستان نے انڈیا کو شکست دے کر انڈر 19 ایشیا کپ کا ٹائٹل اپنے نام کر لیا مگر اس میچ میں پاکستان کے پہاڑ جیسے سکور کے پیچھے جس نوجوان کا ہاتھ تھا، اسے لمبی اننگز کھیلنے کا بہت شوق ہے۔
یہ پہلا موقع نہیں جب سمیر منہاس نے ایک بڑی اننگز کھیل کر ٹیم کو اچھا آغاز فراہم کیا ہو۔ اسی ایونٹ کے مجموعی طور پر دوسرے اور پاکستان پہلے میچ میں انھوں نے ملائیشیا کے خلاف 177 رنز کی ناقابل شکست اننگز کھیلی تھی۔
ملائیشیا کے خلاف اننگز میں انھوں نے 11 چوکے اور آٹھ چھکے مارے تھے۔
صرف 19 سال اور 19 دن کی عمر میں دو بڑی اننگز کھیلنے والے سمیر منہاس دو دسمبر سنہ 2006 کو ملتان میں پیدا ہوئے۔ دائیں ہاتھ کے اوپننگ بلے باز کا تعلق ایک ایسے خاندان سے ہے جس میں پہلے ہی سے ایک اور انٹرنیشنل کرکٹر موجود ہے۔
وہ پاکستان کی چار ٹی20 انٹرنیشنل میچوں میں نمائندگی کرنے والے عرفات منہاس کے چھوٹے بھائی ہیں، جنھوں نے 2023 اور 2024 میں ہانگ کانگ، افغانستان، بنگلہ دیش اور زمبابوے کے خلاف گرین شرٹس کی نمائندگی کی۔
سمیر منہاس ان نوجوان کھلاڑیوں میں سے ایک ہیں جو پاکستان کرکٹ بورڈ کے پاتھ وے سسٹم سے سامنے آئے ہیں۔ پاکستان انڈر 19 کی نمائندگی کرنے سے پہلے وہ ملتان ریجن انڈر 13، سدرن پنجاب انڈر 16، ملتان انڈر 19 اور ملتان ریجن انڈر 19 کی نمائندگی کر چکے ہیں۔
گزشتہ ماہ تک پاکستان کرکٹ بورڈ کے یوتھ ڈویلپمنٹ پروگرام کے سربراہ کے طور پر کام کرنے والے سابق کپتان اظہر علی نے سمیر منہاس کو مستقبل کے لیے ایک اچھا آپشن قرار دیا۔
صحافی عمیر علوی سے گفتگو کرتے ہوئے ان کا کہنا تھا جب انھوں نے پہلی مرتبہ سمیر منہاس کو رواں سال کراچی کے تربیتی کیمپ میں دیکھا تھا، تب ہی نوجوان کرکٹر نے انھیں متاثر کیا تھا۔
’اس کی کریز پر کھڑے ہونے کی تکنیک بہت اچھی لگی تھی اور شاٹ سلیکشن بھی، اگر اس پر محنت کی جائے تو پاکستان کے لیے مستقبل میں بھی اچھا کھلاڑی ثابت ہوسکتا ہے۔‘
بقول اظہر علی سمیر منہاس کی کامیابی کے پیچھے پاکستان کرکٹ بورڈ کے پاتھ وے سسٹم کا ہاتھ ہے جس کے ذریعے وہ سامنے آئے ہیں۔ وہ ہر ایج گروپ لیول پر اچھی پرفارمنس دیتے رہے ہیں جس کی وجہ سے انھیں ورلڈ کپ اور ایشیا کپ سے پہلے لگائے گئے تربیتی کیمپ میں شامل کیا گیا۔
’چار مہینے پہلے تربیتی کیمپ میں سمیر منہاس نے بڑی محنت کی جس کا نتیجہ آج سب کے سامنے ہے۔ وہ نہ صرف ایک اچھے ٹاپ آرڈر بلے باز ہیں بلکہ بہترین فیلڈر بھی ہیں جو مستقبل میں پاکستان کی نمائندگی کر سکتے ہیں۔‘
اظہرعلی کا کہنا تھا کہ ’ایشیا کپ میں دو سنچریاں بنانے والے سمیر ڈومیسٹک انڈر19 ایونٹ میں بھی ٹاپ سکورر رہے، جہاں انھوں نے دو سنچریاں سکور کر کے اپنی فارم سے سلیکٹرز کو متوجہ کیا تھا۔‘
ان کے مطابق ملائشیا انڈر 19 کے خلاف سمیر منہاس کی سنچر ی کو بھلایا نہیں جا سکتا جبکہ انڈیا کے خلاف ناک آؤٹ مرحلے میں ان کی جارحانہ اور ذمہ دارانہ بلے بازی ان کے ٹیلنٹ کا منہ بولتا ثبوت ہے۔
سوشل میڈیا پر سمیر منہاس کے چرچے
پاکستان کی نیشنل کرکٹ ٹیم کے اوپنر اور جارحانہ کھیل کی وجہ سے جانے پہچانے جانے والے صاحبزادہ فرحان نے سمیر منہاس کی فائنل میچ میں انڈیا کے خلاف بیٹنگ کے دوران لی جانے والی ایک تصویر ایکس پر شئیر کی اور اس کے ساتھ انھوں نے لکھا کہ ’کیا کمال کا کھلاڑی ہے سمیر منہاس۔‘
پاکستان کرکٹ ٹیم کے سابق کپتان راشد لطیف نے ایکس پر لکھا کہ ’سمیر منہاس ایشیا کپ انڈر 19 ٹورنامنٹ میں بہت مستقل مزاج رہے، اس ایونٹ میں 471 رنز بنائے۔ کیا کمال کی پرفارمنس تھی۔‘
خان نامی ایک ایکس صارف نے سمیر منہاس کی تعریف میں لکھا کہ ’انڈیا کے ساتھ فائنل میں سمیر کی شاندار کارکردگی، کیا ہی کمال کا نوجوان کھلاڑی ہے۔‘
ایک اور ایکس صارف شاکر عباسی نے سمیر منہاس کی انڈیا کے خلاف ایشین کرکٹ کونسل انڈر 19 ایشیا کپ کے فائنل میں شاندار کارکردگی پر لکھا کہ ’توجہ سے دیکھیے۔۔۔ سمیر منہاس کی کلاس۔ کیا کھلاڑی ہے۔ کیا شاندار اننگز تھی۔ فائنل میں 172 اور وہ بھی انڈیا کے خلاف ایک ایسی بات ہے جسے الفاظ میں بیان ہی نہیں کیا جاسکتا۔‘
ہارون نامی صارف نے اپنے جذبات کا اظہار کچھ یوں کیا کہ ’سمیر منہاس ایک حقیقی بیٹسمین ہیں۔ وہ صورتحال کو بہترین انداز میں سمجھنے اور استعمال کرنا جانتے ہیں۔ وہ ایک مضبوط دفاعی صلاحیت کے حامل ہیں۔ وہ بڑی شاٹس لگا سکتے ہیں۔ اُمید ہے کہ وہ اپنی کارکردگی پر توجہ مرکوز رکھیں گے۔‘
جب وسیم اکرم نے بابر اعظم سے سوال کرتے ہوئے پی ایس ایل میں ’روٹی‘ کا قصہ سنایاپاکستان کی تاریخکا ’سب سے عظیم‘ کرکٹر کون ہے؟کرفیو میں پاکستانی ٹیم کی ٹریننگ، تمل ٹائیگرز کا خوف اور رانا ٹنگا کے آنسو: نوے کی دہائی کی یادیں اور ’وہ قرض جو سری لنکا آج چُکا رہا ہے‘سیاسی اشارے اور متنازع فیصلے: پاکستان اور انڈیا کے درمیان کرکٹ میچ تعلقات میں بہتری کے بجائے ’جنگ کا تسلسل‘ کیسے بنے؟آئی پی ایل کی نیلامی میں کرکٹرز کے لیے کروڑوں روپے کی بولیاں: ’اب پی ایس ایل کو بھی کچھ نیا کرنا ہوگا‘