آئی سی سی ویمنز ورلڈ کپ کے چھٹے میچ میں انڈیا نے پاکستان کو 88 رنز سے شکست دے دی ہے۔
اتوار کو کولمبو کے پریماداسا کرکٹ سٹیڈم میں 248 رنز کے تعاقب میں پاکستان کی پوری ٹیم 43ویں اوور میں 159 رنز بنا کر ڈھیر ہو گئی۔
پاکستان کی بیٹنگ لائن مکمل فلاپ ہو گئی اور اس کے آٹھ کھلاڑی ڈبل فیگر میں داخل نہ ہو سکے۔ پاکستان کی جانب سے سدرہ امین 81 رنز کے ساتھ نمایاں رہے۔
اس سے قبل پاکستان کی دعوت پر انڈیا نے بیٹنگ کرتے ہوئے مقررہ اوورز میں 247 رنز بنائے تھے۔
انڈیا کی جانب سے ہارلین دیول 46 رنز کے ساتھ نمایاں رہی جبکہ پاکستان کی جانب سے ڈیانا بیگ نے چار وکٹیں حاصل کی۔
پاکستان کی اننگز
پاکستان نے حدف کے تعاقب کا آغاز کیا تو پہلی وکٹ چوتھے اوور میں اس وقت گری جب ٹیم کا مجموعی سکور چھ رنز تھے۔ اوپنر منیبہ علی دو رنز بنا کر آؤٹ ہوئیں، یوں پاکستان کی کارکردگی آغاز سے ہی ناقص اور سست رہی۔
ان کے بعد اوپنر صدف شمس بھی چھ رنز بنا کر چلتی بنی۔
پاکستان کی جانب سے سدرہ امین نے طویل اننگز کھیلی اور نو چوکوں اور ایک چھکے کی مدد سے 106 گیندوں پر 81 رنز بنا کر پویلین لوٹ گئیں۔
نٹالیہ پرویز 33 اور اور سدرہ نواز 14 رنز بنا کر آؤٹ ہوئیں جبکہ ان کے علاوہ کوئی بھی پاکستانی کرکٹر ڈبل فیگر میں داخل نہ ہوسکیں۔
انڈیا کی جانب سے کرانتی گوند اور دیپتی شرما نے تین تین جبکہ سنہ رانا نے دو وکٹیں حاصل کیں۔
انڈیا کی جانب سے کرانتی گوند نے تین وکٹیں حاصل کی (فوٹو: اے ایف پی)انڈیا کی اننگز
انڈیا نے اپنی اننگز کا آغاز پراتیکا راول اور سمریتی مندھانا کے ساتھ کیا۔ پراتیکا راول نے 31 گیندوں پر 37 رنز کی مفید اننگز کھیلی اور انہیں سعدیہ اقبال نے بولڈ کیا جبکہ سمریتی مندھانا 23 رنز بنا کر فاطمہ ثنا کی گیند پر ایل بی ڈبلیو ہوئیں۔
ہارلین دیول نے ٹیم کے لیے سب سے طویل اننگز کھیل کر آؤٹ ہوئیں، انہوں نے 65 گیندوں پر 46 رنز بنائے جس میں چار چوکے اور ایک چھکا شامل تھا۔
کپتان ہرمن پریت کور 19 رنز بنا کر ڈیانا بیگ کا شکار بنیں۔
جییمائما روڈریگز نے 37 گیندوں پر 32 رنز بنائے، ان کی اننگز میں 5 چوکے شامل تھے جبکہ دیپتی شرما نے 25 رنز کی محتاط اننگز کھیلی۔ سنہ رانا بھی 33 گیندوں پر 20 رنز بنا کر آؤٹ ہوئیں۔
اختتامی اوورز میں رچا گھوش نے برق رفتاری سے بیٹنگ کرتے ہوئے 20 گیندوں پر 35 رنز بنائے جس میں تین چوکے اور دو چھکے شامل تھے، وہ ناٹ آؤٹ رہیں۔
انتظامیہ کو مچھروں کی وجہ سے 34 ویں اوور میں کچھ دیر کے لیے میچ روکنا بھی پڑا (فوٹو: اے ایف پی)
شری چرانی ایک، کرانتی گوڈ آٹھ جبکہ رینوکا سنگھ صفر پر آؤٹ ہوئیں۔
پاکستان کی جانب سے ڈیانا بیگ نے چار، سعدیہ اقبال اور فاطمہ ثنا نے دو دو جبکہ رامین شمیم اور نشارہ سندھو نے ایک ایک وکٹ حاصل کی۔
رواں ایونٹ میں دونوں ٹیمیں پہلی مرتبہ آمنے سامنے تھیں جبکہ اس سے قبل انڈیا نے سری لنکا کے خلاف کھیلا گیا میچ جیت رکھا ہے، تاہم پاکستان کو بنگلہ دیش نے ہرا دیا تھا۔