شمال مشرقی بحیرہ عرب میں بننے والا ڈیپ ڈپریشن سمندری طوفان میں تبدیل ہوگیا جسے ’شکتی‘ کا نام دیا گیا ہے۔ طوفان کا یہ نام سری لنکا نے تجویز کیا تھا جس کا مطلب "طاقت" ہے۔
ماہرینِ موسمیات کے مطابق سمندری طوفان شکتی آئندہ 24 گھنٹوں کے دوران شدید سمندری طوفان میں تبدیل ہوسکتا ہے۔ طوفان کے مرکز میں ہوا کی رفتار 75 کلومیٹر فی گھنٹہ ریکارڈ کی گئی ہے، جب کہ یہ 6 اکتوبر تک بحیرہ عرب میں موجود رہنے کا امکان ہے۔
محکمہ موسمیات کے مطابق طوفان کراچی کے جنوب میں 360 کلومیٹر کے فاصلے پر موجود ہے۔ اس کے باعث کراچی سمیت سندھ اور بلوچستان کے مختلف علاقوں میں آج بھی بارش کا امکان ظاہر کیا گیا ہے۔
ادھر سمندر میں طغیانی کی کیفیت برقرار ہے جس پر ماہی گیروں کو 5 اکتوبر تک گہرے سمندر میں نہ جانے کی ہدایت جاری کی گئی ہے۔