ایشیا کپ ٹی20 کے میچز دبئی اور ابوظبی میں، پاکستان اور انڈیا اگلے مہینے مدمقابل ہوں گے

ایشا کپ ٹی20 کے میچز کی میزبانی متحدہ عرب امارات کے شہر دبئی اور ابوظبی کریں گے۔

خبر رساں ایجنسی روئٹرز کے مطابق ایشین کرکٹ کونسل نے ٹورنامنٹ کے شیڈول کا اعلان کرتے ہوئے کہا ہے کہ روایتی حریفوں انڈیا اور پاکستان کا مقابلہ 14 ستمبر کو دبئی میں ہوگا۔

تعلقات میں کشیدگی کے باعث طویل عرصے سے پاکستان اور انڈیا کی کرکٹ ٹیموں کے میچز متحدہ عرب امارات کی سرزمین پر کھیلے جاتے ہیں۔

ایشیا کپ ٹی20 کے شیڈول کے مطابق متحدہ عرب امارات کے دو شہروں کے سٹیڈیمز میں تمام میچز کھیلے جائیں گے۔ ٹورنامنٹ کا آغاز 9 ستمبر کو ابوظبی میں ہوگا جبکہ فائنل میچ 28 ستمبر کو دبئی میں کھیلا جائے گا۔

ایشیا کپ ٹی20 میں کُل آٹھ ٹیمیں مدمقابل ہوں گی۔ اس ٹورنامنٹ کے گزشتہ ایڈیشن میں چھ ٹیموں نے حصہ لیا تھا۔

ٹورنامنٹ کے 11 میچز دبئی جبکہ آٹھ ابوظبی میں کھیلے جائیں گے۔

پہلا میچ افغانستان اور ہانگ کانگ کی ٹیموں کے درمیان ہوگا۔

ایشین کرکٹ کونسل کے صدر محسن نقوی نے میڈیا کو جاری کیے گئے ایک بیان میں کہا ہے کہ ’متحدہ عرب امارات میں ٹورنامنٹ کی میزبانی سے دنیائے کرکٹ کے ایک بہت ہی پُرجوش کراؤڈ اور کرکٹ کے مرکز میں آنا ہے۔‘

اُن کا کہنا تھا کہ ’دبئی اور ابوظہبی کرکٹ کے کھلاڑیوں، شائقین اور براڈکاسٹروں کو یکساں اور عالمی معیار کا تجربہ فراہم کرنے کے لیے اچھی طرح سے لیس ہیں۔‘

گروپ اے میں دفاعی چیمپئن انڈیا، پاکستان، متحدہ عرب امارات اور اومان شامل ہیں جبکہ گروپ بی میں بنگلہ دیش، سری لنکا، افغانستان اور ہانگ کانگ شامل ہیں۔