سندھ بلڈنگ کنٹرول اتھارٹی حکام کی جانب سے شہر میں خستہ حال عمارتوں کو خالی کرانے کے لیے کئی عمارتوں کے باہر نوٹس چسپاں کرنے کے ساتھ عمارتیں سیل بھی کردی گئی ہیں۔
وزیر بلدیات سعید غنی کو رپورٹ پیش کی گئی کہ شہر میں کئی عمارتیں خستہ حال ہیں ان کو گرایا جائے، وزیر بلدیات نے عمارتوں کو فوری گرانے کے احکامات جاری کردیے ہیں۔ شہر میں ایس بی سی اے کی جانب سے کئی عمارتوں کو نوٹس جاری کردیے گئے ہیں۔ رہائشیوں نے عمارتیں خالی کرنے سے انکار کرتے ہوئے کہا کہ سندھ حکومت متبادل جگہ فراہم کرے۔
جوبلی چوک پر سندھ بلڈنگ کنٹرول اتھارٹی کی جانب سے پانچ عمارتوں کو خالی کرانے کا حکم دیا گیا ہے، جوبلی کی ایک عمارت کے رہائشی علی نواز چانڈیو کا کہنا ہے کہ شہر میں بلڈر مافیا سندھ بلڈنگ کنٹرول اتھارٹی سے مل کر کئی عمارتوں کو خالی کرانا چاہتی ہے تاکہ بلڈر اس پلاٹ کو خالی کراکر نئی عمارت بناسکے۔
علی نواز چانڈیو نے مزید کہا کہ نوٹس جاری نہیں کیا جارہا لیکن خالی کرانے کے لیے زبردستی کی جارہی ہے، لگتا ہے کہ حکام خود ایس میں ملوث ہیں اور بلڈر مافیا کے کہنے پر ایسے اقدامات کررہی ہے۔
عمارتوں کے مکینوں نے الزام لگایا کہ بلڈر مافیا ایس بی سی اے کو مختلف عمارتوں کی نشاندہی کررہے ہیں تاکہ عمارتوں کو گرایا جاسکے۔
یاد رہے کہ جوبلی چوک پر کئی ایسی عمارتیں ہیں جن کو قومی ورثہ قرار دیا گیا ہے ان کو گرا کر نئی عمارت بنانا جرم ہے۔ وزیر اعلی اس بات کو یقینی بنائے جہاں عمارت کو گرایا جارہا ہے وہاں صرف ان لوگوں کا حق ہے جن کے گھر کو گرایا گیا۔