پی ٹی آئی کے لیے جیل کاٹنے والی عالیہ حمزہ ، بانی کے لئے چلائی جانے والی تحریک میں نظرانداز

پی ٹی آئی صوبہ پنجاب کی چیف آرگنائزر عالیہ حمزہ نے دلبرداشتہ ہوکر پارٹی قیادت کے لیے طنز بھرا ٹویٹ کر دیا۔ عالیہ حمزہ کا شمار پاکستان تحریک انصاف کی سرگرم رہنماؤں میں ہوتا ہے۔ وہ ہمیشہ پارٹی کی احتجاجی تحریکوں میں بڑھ چڑھ کر شامل ہوتی رہی ہیں۔ تاہم پی ٹی آئی قیادت کے دورہ لاہور کے دوران پارٹی اجلاس میں صوبے کی چیف آرگنائزر ہونے کے باوجود انہیں مدعو نہیں کیا گیا۔

نظرانداز کیے جانے پرعالیہ حمزہ نے پی ٹی آئی قیادت پرتنقید کے نشترچلا دئیے، جس کے تحریک انصاف میں اختلافات کھل کر سامنے آگئے۔ پنجاب کی چیف آرگنائزر نے اپنی ٹویٹ میں لکھا کہ پارٹی قیادت کی اطلاعات کے مطابق میں گزشتہ دو دن سے بہت مصروف تھی۔ ایسی مصروفیات جن کا شاید مجھے بھی علم نہیں تھا۔ کیا کوئی اس پر روشنی ڈالے گا ، عالیہ نے اس کے ساتھ ہی سوال بھی اٹھا دیا کہ بانی پی ٹی آئی عمران خان کی رہائی کے لیے کسی لائحہ عمل کا کل یا آج اعلان ہوا ہے۔ تحریک کہاں سے اور کیسے چلے گی۔ 5 اگست کے بجائے 90 دن کا منصوبہ کہاں سے آیا ہے۔ اگر آپ میں سے کسی کی نظر سے یہ منصوبہ گزرا ہو تو میری بھی رہنمائی کر دیں۔ عالیہ حمزہ نے کہا کہ ہمارا پورا فوکس اور نشانہ عمران خان کی رہائی اور نعرہ صرف ایک ہی کہ ڈٹ جاؤ یا ہٹ جاؤ۔