وفاقی وزیرداخلہ محسن نقوی نے ایف آئی اے کراچی زون کا دورہ کیا اور اہم اجلاس میں حوالہ ہنڈی مافیا کےخلاف موثر کریک ڈاؤن کا حکم دیا۔
محسن نقوی کا کہنا تھا کہ حوالہ ہنڈی میں ملوث بڑے بڑے لوگوں پر ہاتھ ڈالا جائے اور کسی کا دباؤ قبول کیے بغیر مافیا کے خلاف بلا امتیاز کارروائی کی جائے۔
وزیرداخلہ نے بھکاریوں کو بیرون ملک بھجوانے والے ایجنٹ مافیا کی سرکوبی کا حکم دیتے ہوئےکہا کہ بھکاری مافیا پاکستان کا امیج خراب کر رہا ہے،بیرون ملک سے ڈی پورٹ ہوکر آنے والے بھکاریوں کی گرفتاری یقینی بنائی جائے، انہوں نے کہا کہ ایجنٹس کے خلاف بلاامتیاز ایکشن نظر آنا چاہیے، مفرور ایجنٹس کو دیگر صوبوں کے تعاون سے گرفتار کیا جائے۔
وزیر داخلہ کا کہنا تھا کہ جعلی ادویہ کا کاروبار کسی صورت برداشت نہیں، جعلی ادویہ کے مکروہ دھندے ملوث لوگوں سے آہنی ہاتھوں نمٹا جائے، جعلی ادویہ کے کاروبار میں ملوث لوگوں کی اصل جگہ جیل ہے، محسن نقوی نے نان کسٹم مصنوعات کے خلاف بھرپور کارروائی کا حکم دیتے ہوئے کہا کہ 5 ہزار سے زائد ڈالر بیرون ملک لے کر جانے والے مسافروں کے خلاف سخت ایکشن لیا جائے۔ انہوں نے ایف آئی اے حکام کو ایسے مسافروں کے خلاف قانون کے مطابق بھرپور کارروائی کی ہدایت کی۔
اجلاس میں ڈائریکٹر کراچی زون نعمان صدیق نے وزیر داخلہ محسن نقوی کو بریفنگ دی اور وزیر داخلہ محسن نقوی کو ایف آئی اے کراچی زون کی کارکردگی اور ایشوز سے آگاہ کیا، اجلاس میں ایڈیشنل ڈائریکٹر جنرل ایف آئی اے ساؤتھ مجاہد اکبر خان، ڈائریکٹر ایف آئی اے کراچی زون نعمان صدیق، ڈپٹی ڈائریکٹر اینٹی منی لانڈرنگ، ڈپٹی ڈائریکٹر امیگریشن، ڈپٹی ڈائریکٹر اینٹی کرپشن، تمام اسسٹنٹ ڈائریکٹرز اور ایف آئی اے ساؤتھ حکام نے بھی شرکت کی۔