Getty Images
گذشتہ ہفتے انڈیا کے زیر انتظام کشمیر کے علاقے پہلگام میں مسلح عسکریت پسندوں کے ہاتھوں 26 افراد کی ہلاکت کے بعد انڈین سوشل میڈیا پر اس واقعے کے متاثرین سے متعلق بہت سی ویڈیوز وائرل ہوئیں۔ ایسی ہی ایک ویڈیو ریاست گجرات سے تعلق رکھنے والی خاتون شیتل کلاٹھیا کی بھی ہے۔
پہلگام حملے میں شیتل کے 44 سالہ شوہر شیلیش بھائی کلاٹھیا بھی مارے گئے تھے۔
انڈیا کے مرکزی وزیر سی آر پاٹل ریاست گجرات کے شہر سورت میں رہائش پذیر شیتل کے خاندان سے اظہار تعزیت کے لیے گئے۔ اس موقع پر شیتل اپنے جذبات پر قابو نہ رکھ پائیں اور انھوں نے وزیر موصوف کے سامنے اپنے درد اور دُکھ کا کُھل کر اظہار کیا۔
شیتل نے تعزیت کے لیے آئے وزیر کو مخاطب کرتے ہوئے کہا کہ ’آپ کے پاس بہت سی وی آئی پی کاریں ہیں۔ لیکن ٹیکس دینے والوں کا کیا ہے؟ وہاں (پہلگام کا وہ علاقہ جہاں 26 افراد کو ہلاک کیا گیا) نہ تو کوئی فوجی تھا اور نہ ہی کوئی میڈیکل ٹیم۔‘
سوشل میڈیا پر شیتل کی یہ ویڈیو کافی وائرل ہوئی جس میں وہ کشمیر کے معروف سیاحتی مقام پر کسی بھی سکیورٹی اہلکار کی عدم موجودگی کا شکوہ کرتی نظر آتی ہیں۔
انڈیا کے معروف اخبار ’دی ہندو‘ نے ریاست مہاراشٹر سے تعلق رکھنے والے شخص پارس جین سے بات کی ہے جو اس حملے میں بال بال بچے تھے۔ پارس کے مطابق پہلگام میں ہونے والے حملے کا دورانیہ 25-30 منٹ تک جاری رہا۔ پارس کا دعویٰ ہے کہ حملے کے مقام پر نہ تو کوئی پولیس اہلکار موجود تھا اور نہ ہی کوئی فوجی اہلکار۔
’دی ہندو‘ کی اسی رپورٹ کے مطابق سینٹرل ریزرو پولیس فورس (سی آر پی ایف) کا کیمپ حملے کی اِس جگہ سے سات کلومیٹر دور تھا، جبکہ فوج کی راشٹریہ رائفلز (آر آر) کا کیمپ محض پانچ کلومیٹر کی دوری پر تھا۔
انڈیا میں ایک طرف جہاں ہلاک ہونے والوں کے لواحقین اور بچ جانے والے اپنی آپ بیتیاں شیئر کر رہے ہیں وہیں آئے روز اس معاملے سے متعلق سوالات بھی اٹھ رہے ہیں اور فی الحال اِن میں سے بہت سے سوالات کے جوابات نہیں مل سکے ہیں۔
ان سوالوں میں سب سے اہم سوال یہ ہے کہ پہلگام کے اس مشہور سیاحتی مقام ’بیسرن‘ پر سیاحوں کی حفاظت کے لیے کوئی سکیورٹی اہلکار کیوں موجود نہیں تھا؟
’بیسرن‘ جیسے معروف سیاحتی مقام پر سکیورٹی کیوں موجود نہیں تھی؟Getty Imagesپہلگام میں تعینات سکیورٹی فورسز کے اہلکار
پہلگام میں حملے کے بعد یہ سوال بار بار اٹھ رہا ہے: متاثرہ افراد کے لواحقین کی طرف سے بھی اور عام افراد کی جانب سے بھی۔
صحافی اور کشمیر کے امور کی ماہر انورادھا بھسین کہتی ہیں کہ جہاں تک انھیں یاد ہے انھوں نے ہمیشہ جموں و کشمیر میں فوجی اہلکاروں کی بھاری تعیناتی دیکھی ہے۔
انورادھا بھسین کا کہنا ہے کہ ’سنہ 1990 کی دہائی سے مجھے جموں کشمیر میں کوئی ایسی عوامی جگہ یاد نہیں ہے جہاں سکیورٹی موجود نہ ہو۔ ہر جگہ آپ کو کوئی نہ کوئی سکیورٹی اہلکار یا سکیورٹی سے متعلق انتظامات نظر آتے ہیں۔ اس لیے اس علاقے میں سکیورٹی انتظامات کا نہ ہونا باعثِ حیرت ہے۔‘
اس کے ساتھ انھوں نے کچھ اور سوالات بھی اٹھائے ہیں۔ انھوں نے سوال کیا کہ حملے کے چند گھنٹوں بعد ہی مبینہ حملہ آوروں کے نام کیسے منظرِ عام پر آئے؟ انھوں نے یہ سوال بھی کیا کہ متاثرین اور اُن کے اہلخانہ کی دل دہلا دینے والی تصاویر کیسے منظر عام پر لائی گئیں؟
وہ کہتی ہیں کہ ’اگرچہ سکیورٹی فورسز کو وہاں پہنچنے میں وقت لگا، مگر دوسری جانب چند ہی گھنٹوں میں اُن کے پاس حملہ آوروں کی تصاویر موجود تھیں۔ وہ اس نتیجے پر کیسے پہنچے؟ یہ تحقیقات زیادہ قابل اعتبار نہیں لگتیں۔ ایسے واقعات کی ایک تاریخ رہی ہے جن کی تحقیقات پر سوالیہ نشان لگے ہیں۔ یہ کچھ سوالات ہیں جو میرے ذہن میں ہیں۔‘
وہ کہتی ہیں کہ سنہ 2019 میں آرٹیکل 370 ہٹائے جانے کے بعد بھی کشمیر میں ایسے واقعات ہو رہے ہیں۔ وہ کہتی ہیں کہ یہ واقعہ دنیا کے سب سے زیادہ ملیٹرائزڈ زون (جہاں علاقہ جہاں فوج کی بڑی موجودگی رہتی ہے) میں پیش آیا، اس لیے بڑے سوالات اٹھتے ہیں۔
Getty Imagesانورادھا بھسین: ’یہ ایک سیاسی بیانیہ ہے کہ عسکریت پسندی ختم ہو گئی ہے۔ پچھلے پانچ برسوں میں جو بھی امن قائم ہوا ہے وہ فوجی کنٹرول کی وجہ سے ہے‘
انورادھا بھسین کہتی ہیں کہ ’گذشتہ پانچ برسوں میں کچھ اور واقعات بھی رونما ہوئے ہیں، اس لیے یہ نہیں کہا جا سکتا کہ عسکریت پسندی ختم ہو گئی ہے۔ یہاں تک کہ سکیورٹی اہلکار بھی جب اس معاملے پر بات کرتے ہیں تو ’کنٹرولڈ‘ جیسے الفاظ کا استعمال کرتے ہیں۔ وہ عسکریت پسندی کے ’خاتمے‘ جیسے الفاظ استعمال نہیں کرتے۔ یہ ایک سیاسی بیانیہ ہے کہ عسکریت پسندی ختم ہو گئی ہے۔ پچھلے پانچ برسوں میں جو بھی امن قائم ہوا ہے وہ فوجی کنٹرول کی وجہ سے ہے۔‘
دہلی کی جواہر لعل نہرو یونیورسٹی (جے این یو) میں سکول آف انٹرنیشنل سٹڈیز کے پروفیسر امیتابھ مٹو سکیورٹی اور سلامتی سے متعلقہ امور کے ماہر سمجھے جاتے ہیں۔
انورادھا بھسین کی جانب سے اٹھائے گئے سوالات کا جواب دیتے ہوئے وہ کہتے ہیں کہ ’گذشتہ چند برسوں میں سیاحتی مقامات پر فوجی دستوں کی بھاری تعیناتی سے گریز کرنے کا رجحان نظر آیا ہے۔‘
وہ کہتے ہیں کہ ’اسے ایک حکمت عملی کے طور پر اختیار کیا گیا ہے، جو اگرچہ مؤثر تھی لیکن زیادہ واضح نہیں تھی۔‘
تاہم وہ کہتے ہیں کہ ’کسی بھی صورت یہ سکیورٹی میں ایک بڑی کوتاہی تھی۔‘
بی بی سی نے جموں و کشمیر کے سابق ڈائریکٹر جنرل آف پولیس (ڈی جی پی) ایس پی وید سے بھی اس حوالے سے بات کی ہے۔
انھوں نے کہا کہ چونکہ سیاحوں کو دور دراز علاقے میں لے جایا جا رہا تھا اس لیے وہاں پولیس اہلکاروں کو تعینات کیا جانا چاہیے تھا۔
پہلگام حملہ اور کشیدگی: پاکستان اور انڈیا کے تنازع میں چین کس کا ساتھ دے گا؟سات ماہ کی حاملہ گوجرانوالہ کی ماریہ کو انڈیا چھوڑنے کا حکم: ’بچے کے منتظر تھے لیکن اب سب کچھ بدل گیا ہے‘پاکستانی فضائی حدود کی بندش سے انڈین ایئرلائنز کو کتنا نقصان ہو گا؟پہلگام حملہ: کیا انڈین حکومت کو اپنی سکیورٹی حکمت عملی تبدیل کرنا ہو گی؟
انھوں نے مزید کہا کہ ’میرے خیال میں وہاں مسلح پولیس کی موجودگی ہونی چاہیے تھی۔ پولیس یا نیم فوجی دستوں کو وہاں ہونا چاہیے تھا۔ اگر وہ وہاں ہوتے تو دہشت گردوں سے نمٹ سکتے تھے۔ یہ بھی سچ ہے کہ ہر جگہ پولیس اہلکار موجود نہیں ہو سکتے کیونکہ وسائل محدود ہیں۔ لیکن اگر سیاح دور دراز کے علاقے میں جا رہے تھے تو وہاں کچھ پولیس والوں کو ہونا چاہیے تھا۔‘
لیفٹیننٹ جنرل (ریٹائرڈ) ستیش دوآ ایک طویل عرصے تک جموں و کشمیر میں تعینات رہے ہیں۔ وہ کہتے ہیں کہ ’فوج اور نیشنل رائفلز (اے آر) کے اہلکار ہر جگہ موجود نہیں ہو سکتے۔ وہ دہشت گردوں سے نمٹنے کے لیے سرحد پر تعینات ہیں۔ اب اگر ہم پولیس کی بات کریں تو وادی کشمیر 120 کلومیٹر لمبی اور 38 کلومیٹر چوڑی ہے۔ ہر جگہ پولیس اہلکاروں کو تعینات کرنا ممکن نہیں ہے۔‘
Getty Imagesکشمیر میں پہلی بار سیاحوں کو نشانہ بنایا گیا ہےعام لوگوں کو کیوں نشانہ بنایا گیا؟
پہلگام حملے میں عام شہریوں کو نشانہ بنانے پر بھی سوال اٹھا ہے۔ اس حملے میں شدت پسندوں نے ایسا طریقہ اپنایا جو ماضی میں اس خطے میں ہوئے دوسرے حملوں سے مختلف تھا۔
اس حملے میں فوجی یا پولیس نہیں بلکہ عام شہریوں کو نشانہ بنایا گیا۔ جموں و کشمیر یا ملک کے کسی بھی حصے میں طویل عرصے بعد اس طرح کا یہ پہلا حملہ تھا، جس میں اتنے بڑے پیمانے پر عام لوگوں کو نشانہ بنایا گیا تھا۔
ریٹائرڈ لیفٹیننٹ جنرل ستیش دوآ اس کی تفصیل بتاتے ہیں۔ ’گذشتہ پانچ برسوں میں وادی کشمیر کے حالات میں بہتری اور ایک مثبت تبدیلی آئی ہے۔ لوگ دوبارہ معمول کی زندگی کی طرف لوٹنے لگے ہیں۔ سیاحت بھی بہت تیزی سے بڑھنے لگی ہے۔ دہشت گرد کبھی بھی سیاحتی علاقوں کو نشانہ نہیں بناتے ہیں۔‘
’یہ پوری دنیا میں اور خاص طور پر کشمیر میں ایک بڑا سچ ہے کیونکہ اگر دہشت گرد ایسا کرتے ہیں تو وہ مقامی کشمیریوں کی روزی روٹی کو نشانہ بنائیں گے۔ وہ مقامی لوگوں سے حمایت کی توقع رکھتے ہیں اس لیے اس قسم کی حرکت سے وہی حمایت کھوئيں گے۔ اس لیے ہماری یہ سمجھ رہی ہے کہ دہشت گرد عام لوگوں کو نشانہ نہیں بنائیں گے۔‘
انھوں نے مزید کہا کہ ’جب میں کور کمانڈر تھا، تب بھی لوگ مجھ سے پوچھتے تھے کہ کیا وہ کشمیر (سیاحت کے لیے) آ سکتے ہیں؟ میں نے ہمیشہ اُن سے کہا، براہ کرم آئیں۔ آپ ڈل جھیل کے قریب بیٹھ سکتے ہیں یا سیاحتی مقامات کا دورہ کر سکتے ہیں کیونکہ ان جگہوں پر حملے نہیں ہوتے ہیں۔‘
پروفیسر امیتابھ مٹّو اس حملے میں عام شہریوں کو نشانہ بنانے کی وجہ پر سوال اٹھاتے ہیں۔
وہ کہتے ہیں کہ ’دہشت گرد گروپوں نے عام شہریوں کو کیوں نشانہ بنانا شروع کر دیا ہے؟ پہلے وہ زیادہ تر فوجی تنصیبات کو نشانہ بناتے تھے۔ اس بار انھوں نے کشمیری عوام کے جذبات کا کوئی خیال نہیں رکھا۔ کیا یہ معمول کے تصور کو مسترد کرنا ہے؟‘
Getty Imagesپہلگام میں جان گنوانے والے سنجے لیلے کے اہل خانہ
'پہلے، دہشت گرد گروپوں کی یہ حکمت عملی تھی کہ وہ فوجی اہداف اور دوسرے اہداف، جن کا مقامی آبادی پر اثر پڑ سکتا ہے، کے درمیان فرق کرتے تھے۔اب یہ فرق ختم ہو گیا ہے۔ سوائے اس کے کہ اس بار انھوں نے ہندوؤں کو نشانہ بنایا۔‘
دوآ کا یہ بھی ماننا ہے کہ شہریوں کو نشانہ بنانے کی ایک وجہ ملک کے باقی حصوں میں جذبات کو بھڑکانا ہو سکتا ہے۔
انھوں نے کہا کہ ’دہشت گردوں نے کیا کیا؟ انھوں نے ہندو مردوں کو الگ کر کے قتل کیا، مقصد یہ تھا کہ خواتین اپنے شہروں میں واپس جائیں اور اس واقعے کی کہانی سنائیں۔ عورت کی دردناک چیخ کا ہر طرف اثر ہوتا ہے اور پھر اس سے ملک کے مختلف حصوں میں جذبات بھڑک اٹھیں گے۔ انڈیا کو فیصلہ کرنا ہے کہ ہم ان کے جال میں نہ آئیں۔‘
ان کے مطابق یہ 2023 میں اسرائیلیوں پر حماس کے حملے جیسا ہے۔
وہ کہتے ہیں کہ ’انھوں نے حماس کا انداز اپنایا ہے، جیسا کہ حماس نے نووا میوزک فیسٹیول (اسرائیل) میں کیا تھا۔ اس کی وجہ یہ ہے کہ معصوم شہریوں، خاص طور پر سیاحوں کو مارنے کا لوگوں پر سکیورٹی فورسز کو مارنے سے زیادہ اثر پڑتا ہے۔‘
Getty Imagesخارجہ سیکریٹری وکرم مسری نے کہا ہے کہ اس ’حملے‘ کے تار سرحد پار سے ملتے ہیںکیا یہ انٹیلیجنس کی ناکامی تھی؟
امیتابھ مٹو نے الزام عائد کیا انھیں اس حملے میں پاکستان کے ملوث ہونے پر کوئی شک نہیں ہے۔ یاد رہے کہ انڈیا کی حکومت نے اب تک اس حملے کی براہ راست ذمہ داری کسی گروہ یا ملک پر عائد نہیں کی ہے تاہم اس حملے کے بعد پاکستان کے حوالے سے سخت اقدامات کا اعلان کیا ہے۔
تو پھر سوال یہ پیدا ہوتا ہے کہ کیا یہ انٹیلیجنس کی بڑی ناکامی تھی؟
مٹّو کہتے ہیں: ’یہ انٹیلیجنس کی ناکامی ہے۔ ہمیں کوئی ایسی الیکٹرانک معلومات کیوں نہیں مل پائیں جن کے ذریعے ہم اس حملے کی پیش گوئی کر سکتے اور اسے ناکام بنا سکتے۔‘
ریٹائرڈ لیفٹیننٹ جنرل ستیش کا بھی ماننا ہے کہ یہ انٹیلیجنس کی ناکامی تھی۔
جنرل ستیش کہتے ہیں کہ ’کیا ہم کچھ بہتر کر سکتے تھے؟ ہاں۔ میں یہ نہیں کہہ رہا ہوں کہ کوئی کوتاہی نہیں تھی، ہم بہتر انٹیلیجنس اکٹھی کر سکتے تھے۔‘
’اس واقعے سے چند دن پہلے پاکستان کے آرمی چیف نے ایک بیان دیا تھا، اس میں انھوں نے ہندوؤں اور مسلمانوں کے بارے میں بات کی، مسلمانوں کی برتری وغیرہ کی بات کی، ہمیں اس اشارہ کو سمجھنا چاہیے تھا۔ ہمیں ایسی چیزوں کے بارے میں زیادہ محتاط رہنا چاہیے تھا، ہمیں اپنے کانوں اور آنکھوں کو گراؤنڈ پر زیادہ چوکنا رکھنا چاہیے تھا۔‘
انھوں نے مزید کہا کہ ’ملک کو انسانی ذہانت کو بہتر کرنے کی ضرورت ہے۔ اب ہم الیکٹرانک انٹیلیجنس پر بہت زیادہ انحصار کر رہے ہیں۔ یہاں دونوں کا بہتر امتزاج ہونا چاہیے۔‘
پہلگام حملہ اور کشیدگی: پاکستان اور انڈیا کے تنازع میں چین کس کا ساتھ دے گا؟سات ماہ کی حاملہ گوجرانوالہ کی ماریہ کو انڈیا چھوڑنے کا حکم: ’بچے کے منتظر تھے لیکن اب سب کچھ بدل گیا ہے‘شملہ اور جوہری و عسکری نوعیت کے سمجھوتے: پاکستان اور انڈیا کے درمیان اہم معاہدے کون سے ہیں اور اُن کی معطلی کا کیا مطلب ہو گا؟پاک انڈیا ’ورکنگ دشمنی‘ پر کسی کو اعتراض نہیںپاکستانی فضائی حدود کی بندش سے انڈین ایئرلائنز کو کتنا نقصان ہو گا؟پہلگام حملہ: انڈین میڈیا میں کشمیری عسکریت پسند گروپ ’دا ریزسٹنس فرنٹ‘ کا نام اور شکوک و شبہات