لندن: سکول کے باہر تیزاب کا مشتبہ حملہ، ایک کم عمر لڑکی اور لڑکا زخمی

برطانوی پولیس کے مطابق لندن کے ایک سکول کے باہر تیزاب کے ایک مشتبہ حملے میں ایک کم عمر لڑکے اور لڑکی سمیت تین افراد زخمی ہو گئے ہیں۔فرانسیسی خبر رساں ایجنسی اے ایف پی نے پولیس کے حوالے سے بتایا کہ یہ واقعہ پیر کی دوپہر کو پیش آیا جب سکول کے طلبہ اور ایک سٹاف ممبر پر ’مادہ‘ پھینکا گیا۔

لندن پولیس نے اس حوالے سے منگل کو کہا کہ ’استعمال ہونے والے مادے کا تجزیہ کیا جا رہا ہے، اور بظاہر یہ مادہ تیزاب معلوم ہوتا ہے۔‘پولیس کے بیان میں مزید بتایا گیا ہے کہ ’واقعے میں میں 14 برس کی ایک لڑکی کو شدید زخم آئے جبکہ 16 سال کے لڑکے کے زخم شدید نوعیت کے نہیں ہیں، تاہم اسے بھی ہسپتال میں داخل کرا دیا گیا ہے۔‘ لندن پولیس کے مطابق ‘یہ واقعہ مغربی لندن میں ویسٹ منسٹر اکیڈمی سکول کے باہر پیش آیا، اور ملزم کی شناخت اور اُس کی گرفتاری کے لیے تحقیقات تیزی سے جاری ہیں۔‘’واقعے میں معمولی زخمی ہونے والی 27 برس کی خاتون کو ابتدائی طبی امداد کی فراہمی کے بعد ہسپتال سے فارغ کردیا گیا ہے۔‘ سکول کی پرنسپل نمیرہ انوار کا کہنا ہے کہ ’اس افسوس ناک واقعے میں ایک طالب علم، ایک ٹیچر اور عام شہری زخمی ہوئے ہیں۔‘ انہوں نے بتایا کہ ’یہ واقعہ سڑک کے کنارے اس وقت پیش آیا جب طلبہ اور سٹاف سکول کی عمارت سے باہر نکل رہے تھے۔‘اس حوالے سے سکول کی پرنسپل نے مزید کہا کہ ’اس واقعے میں تیزاب سے ملتا جُلتا مادہ استعمال کیا گیا ہے۔‘سکول کی پرنسپل کا کہنا ہے کہ یہ کمیونٹی کے لیے ایک مشکل وقت ہے، واقعے کے بعد منگل کے روز سکول کو بند رکھا گیا۔‘انہوں ںے بتایا کہ ’جامع تحقیقات اور مکمل حفاظتی اقدامات اختیار کرنے کے بعد بدھ سے سکول دوبارہ کھُل جائے گا۔‘