ویسٹ انڈیز کو شکست، پاکستان ورلڈ چیمپیئن شپ آف لیجنڈز کے فائنل میں پہنچ گیا

ورلڈ چیمپئن شپ آف لیجنڈز کے پہلے سیمی فائنل میں پاکستان چیمپئنز نے ویسٹ انڈیز چیمپئنز کو 20 رنز سے شکست دے کر فائنل کے لیے کوالیفائی کر لیا۔

جمعے کو نارتھمپٹن میں کھیلے گئے پہلے سیمی فائنل میں ویسٹ انڈیز چیمپئنز کی ٹیم پاکستان کی جانب سے دیے گئے 199 رنز کے ہدف کے تعاقب میں 178 رنز پر ڈھیر ہوگئی۔

پاکستان کا مقابلہ فائنل میں انڈیا اور آسٹریلیا کے میچ کی فاتح ٹیم سے ہوگا۔

نارتھمپٹن میں کھیلے گئے میچ میں ویسٹ انڈیز چیمپیئنز نے ٹاس جیت کر فیلڈنگ کا فیصلہ کیا تھا۔

پاکستان چیمپیئنز نے اننگز کا آغاز کیا تو شروعات میں ہی ٹیم کا بیٹنگ آرڈر لڑکھڑا گیا۔ شرجیل خان اور شعیب ملک صفر جبکہ صہیب مقصود ایک رن بنا کر آؤٹ ہوگئے۔

 اس کے بعد کامران اکمل اور یونس خان نے ذمہ دارانہ اننگز بیٹنگ کی اور ٹیم بڑا سکور کرنے میں کامیاب ہوئی۔

پاکستان چیمپیئنز نے مقررہ 20 اوورز میں 8 وکٹوں کے نقصان پر 198 رنز بنائے۔

کپتان یونس خان 65 اور کامران اکمل 46 رنز بنا کر نمایاں رہے جبکہ عامر یامین 40 رنز کے ساتھ ناقابل شکست رہے۔

ویسٹ انڈیز چیمپیئنز کی طرف سے فیڈل ایڈورڈز 3 اور سلیمان بین نے دو دو وکٹیں حاصل کیں۔