کیا جی میل بند ہونے جارہا ہے؟ گوگل کا اس حوالے سے ردعمل سامنے آگیا

گوگل کی مقبول ترین ایپلیکیشن جی میل عالمی سطح پر پیغام بھیجنے اور وصول کرنے کے طور پر جانی جاتی ہے جس سے متعلق گزشتہ چند دنوں سے افواہیں سامنے آرہی ہیں کہ یہ سروس اگست 2024 میں بند ہوجائے گی۔

حال ہی میں سوشل میڈیا پر ایک پوسٹ سامنے آئی جس میں ای میل کا اسکرین شاٹ شیئر کیا گیا جس کا عنوان 'Google is sunsetting Gmail' تھا جس کے بعد سوشل میڈیا صارفین تشویش کا شکار ہوگئے اور انہیں لگا کہ جی میل بند ہوجائے گی۔

اسکرین شاٹ میں گوگل کی جانب سے مطلوبہ پیغام میں لکھا گیا ہے کہ دنیا بھر میں لاکھوں لوگوں کو جوڑنے، بغیر کسی رکاوٹ کے مواصلات کو فعال کرنے اور لاتعداد رابطوں کو فروغ دینے کے بعد Gmail کا سفر اختتام پذیر ہو رہا ہے، یکم اگست 2024 سے Gmail باضابطہ طور پر بند ہوجائے گا۔

مذکورہ پوسٹ تیزی سے سوشل میڈیا پر وائرل ہوگئی جس کے بعد صارفین کے ذہنوں میں مختلف سوالات نے جنم لیا۔

افواہوں کو مزید روکنے کے لیے گوگل نے اپنے آفیشل جی میل ایکس اکاؤنٹ پر ٹوئٹ کی اور بتایا کہ یہ تمام خبریں جھوٹی ہیں اور Gmail اپنی سروس بلا تعطل جاری رکھے گا۔