مقبول چینی ایپ ٹک ٹاک کو کامیاب ایپلیکیشن اس لیے بھی کہا جاتا ہے کیونکہ اس سے چند سیکنڈ کی ویڈیوز کے ذریعے دنیا بھر میں مقبولیت حاصل کی ہے۔
اب یہی ایپلیکیشن یوٹیوب کو ٹکر دینے میدان میں آگئی ہے۔ یوٹیوب ویڈیوز کا ایک کامیاب ترین پلیٹ فارم ہے جسے آج تک کوئی مات نہیں دے سکا۔
یہ بات سو فیصد حقیقت ہے کہ اس ویڈیو شیئرنگ ایپلیکیشن نے دیگر سوشل میڈیا پلیٹ فارمز انسٹاگرام، فیس بک اور یوٹیوب کو بھی مختصر ویڈیوز کے فیچر کو اپنانے پر مجبور کیا ہے۔ شارٹس/ ریلز بہت بڑی مثال ہیں۔
اب ایک جانب دیگر کمپنیاں مختصر ویڈیوز پر زیادہ توجہ مرکوز کر رہی ہیں، وہیں دوسری جانب ٹک ٹاک اب زیادہ طویل دورانیے کی ویڈیوز کو اپنے پلیٹ فارم کا حصہ بنانے کے لیے تیار ہے۔
سوشل میڈیا سروسز کی لیکس کے حوالے سے معروف Matt Navarra نے ٹک ٹاک ویڈیوز کے دورانیے میں اضافے کے بارے میں بتایا۔
انہوں نے یہ آپشن برطانیہ کے لیے ٹک ٹاک کے آئی او ایس بیٹا (beta) ورژن میں دریافت کیا تھا۔
انہوں نے ایک انٹرویو کے دوران بتایا کہ کچھ صارفین نے ٹک ٹاک کے اینڈرائیڈ بیٹا ورژن میں بھی اس آپشن کو دیکھا ہے۔
کمپنی کی جانب سے فی الحال اس کی تصدیق نہیں کی گئی۔ابھی ٹک ٹاک پر 10 منٹ طویل ویڈیو پوسٹ کی جا سکتی ہے۔
ٹک ٹاک کی جانب سے بتدریج ویڈیوز کے وقت میں اضافہ کیا گیا ہے، پہلے 15 سیکنڈ سے بڑھا کر 60 سیکنڈ کیا گیا اور جولائی 2021 میں یہ دورانیہ 3 منٹ جبکہ فروری 2022 میں 10 منٹ تک کردیا گیا تھا۔
واضح رہے کہ ٹک ٹاک کی جانب سے چند ماہ قبل 15 منٹ طویل ویڈیوز پوسٹ کرنے کے فیچر کی آزمائش بھی شروع کی گئی تھی۔