فیس بک سماجی رابطے کا ایک بہت بڑا پلیٹ فارم ہے جس کا استعمال دنیا میں کروڑوں صارفین کرتے ہیں۔ مگر کیا فیس بک اتنا محفوظ ہے جتنا ہم اسے سمجھتے ہیں۔
حال ہی میں فیس بک پر ایک نئی جعلسازی کا انکشاف ہوا ہے جہاں لوگوں کے ساتھ دھوکہ دہی کی جا رہی ہے اور ان کا تمام نجی ڈیٹا چوری کیا جا رہا ہے۔
فیس بک صارفین کو ایک نئی جعل سازی کے متعلق خبردار کیا گیا ہے جس میں لوگوں کو کسی کی اچانک موت کی خبر کےجعلی لنکس کو کلک کراتے ہوئے جھانسہ دیا جا رہا ہے۔
ماہرین میٹا نے ذیلی پلیٹ فارم پر پھیلی جعل سازی کی ایک مہم کا انکشاف کیا ہے جس میں ہیکرز لوگوں کو جھانسہ دینے کے لیے پوسٹ میں لکھتے ہیں ’مجھے یقین نہیں ہوسکتا وہ چلا گیا، میں اس کو بہت یاد کروں گا‘ اور جعلی لنک پر کلک کرنے کے لیے اکساتے ہیں۔
غیر ملکی ویب سائٹ بلیپنگ کمپیوٹر کے مطابق مذکورہ لنک صارفین کو ایک ویب سائٹ پر لے جاتا ہے جہاں پر ان کی تمام فیس بک معلومات چرالی جاتی ہے۔
ماہرین کے مطابق یہ مخصوص مہم تقریباً ایک سال قبل شروع ہوئی۔ تب سے ان جعل سازوں نے ہیک کیے گئے اکاؤنٹ کے انبار لگا دیے ہیں تاکہ دیگر صارفین کو باآسانی جھانسہ دیا جاسکے۔
فیس بک کی جانب سے ان غیر محفوظ پوسٹس کو ختم کرنے کا سلسلہ جاری ہے لیکن پلیٹ فارم کا ردِ عمل اتنا تیز نہیں ہوتا جتنی تیزی سے یہ جعل سازوں کی کارروائیاں کرتے ہیں۔