آئینہ صرف چہرہ دیکھنے کے لیے نہیں بلکہ صدیوں سے مختلف مقاصد کے لیے استعمال کیے جاتےرہے ہیں جبکہ آئینے کے حوالے سے کوئی توہم پرست روایات بھی جڑی ہیں تاہم آج ہم آپ کو ایک انوکھے جادوئی آئینے کے بارے میں بتائیں گے جو یقیناً آپ بھی ایک بار ضرور استعمال کرنا پسند کرینگے۔
بارا کوڈا نامی کمپنی نے یہ جادوئی آئینہ تیار کیا ہے، اس آئینے کی خاص بات یہ ہے کہ یہ اسمارٹ آئینہ آپ کے عکس کو دیکھ کر تناؤ یا ڈپریشن کے بارے میں بتا سکتا ہے اور یہی نہیں بلکہ یہ آئینہ آپ کیلئے ایسی ورزشیں اور سرگرمیاں بھی تجویز کر سکتا ہے جس سے تناؤ یا ڈپریشن میں کمی لانا ممکن ہوسکے۔
کمپنی کا دعویٰ ہے کہ یہ دنیا کا پہلا اسمارٹ آئینہ ہے جو ذہنی صحت کو بہتر بنانے کے لیے تیار کیا گیا ہے،اس آئینے کو کہیں بھی لٹکایا جا سکتا ہے اور اس میں عکس کو دیکھ کر روزانہ ذہنی حالت کا جائزہ لینا ممکن ہے۔
اس آئینے میں آرٹی فیشل انٹیلی جنس ٹیکنالوجی پر مبنی کیئر او ایس آپریٹنگ سسٹم استعمال کیا گیا ہے، یہ اے آئی سسٹم تاثرات، بولے جانے والے الفاظ اور اشاروں کو سمجھ سکتا ہے۔
یہ آئینہ صارف کے مزاج کو رئیل ٹائم میں بھانپ لیتا ہے تاکہ ذہنی مسائل کا علم ہوسکے تاہم کمپنی نے بتایا کہ صارفین کی پرائیویسی کو ترجیح دی گئی ہے اور ڈیٹا تک دیگر کی رسائی ممکن نہیں۔