بلوچستان میں سردی کی لہر میں اضافے کے باعث حکومت نے بچوں کو لمبی چھٹیاں دینے کا فیصلہ کیا ہے ، بلوچستان کے سرد علاقوں کے اسکولز اور کالجز 16 دسمبر سے 75 روز کیلئے بند رہیں گے۔
کوئٹہ سمیت صوبے کے 18 اضلاع کے اسکولز اور کالجز میں موسم سرما کی سالانہ تعطیلات 16دسمبر سے 29 فروری تک ہوں گی۔بلوچستان کے محکمہ تعلیم کے نوٹیفکیشن کے مطابق 75 روزہ تعطیلات کے بعد آئندہ سال یکم مارچ کو تعلیمی ادارے دوبارہ کھلیں گے۔
یاد رہے کہ بلوچستان کے اہم علاقوں کوئٹہ، زیارت، مستونگ، قلعہ عبداللہ سمیت شمالی بلوچستان میں سردی میں اضافہ ہو گیا ہے۔قلات میں درجہ حرارت منفی 5 ڈگری سینٹی گریڈ تک گرنے سے سڑکوں، نالیوں اور تالابوں میں کھڑا پانی جم گیا ہے۔کوئٹہ شہر میں کم سے کم درجہ حرارت منفی 2 ڈگری سینٹی گریڈ ریکارڈ کیا گیا ہے۔
دوسری جانب سندھ اور پنجاب کے متعدد علاقوں میں دھند کے باعث حدِ نگاہ کم رہ جانے پر ملتان سکھر اور لاہور سیالکوٹ موٹر وے ٹریفک کے لیے بند کر دی گئی ہے۔ موٹر وے ایم 2 لاہور سے ہرن مینار اور ایم تھری فیض پور تا سمندری اور ایم 4 گوجرہ سے فیصل آباد تک بند ہے۔