پاکستان ہی نہیں بلکہ بھارت میں بھی کرپشن کا ناسور بری طرح پھیل چکا ہے اور سرکاری محکموں میں کوئی بھی کام رشوت کے بغیر ناممکن سمجھا جاتا ہے تاہم بھارت میں رشوت مانگنے والے سرکاری افسر کے خلاف ایسا احتجاج کیا گیا کہ انوکھے احتجاج کی ویڈیو سوشل میڈیا پر وائرل ہوگئی ہے۔
جگتیال ضلع کے میڈی پلی منڈل کے ماہی گیرسوسائٹی کے قیام کی اجازت کے لئے کئی دنوں سے سرکاری عہدیدار دامودر کے دفتر کے چکر کاٹ رہے تھے۔معاملے کو حل کرنے کے لئے رشوت خور عہدیدار کی جانب سے ان لوگوں سے 50 ہزار روپے رشوت کا مطالبہ کیا گیا۔
برہم متاثرین نے کلکٹریٹ پہنچ کر ضلع کلکٹر سے شکایت کی۔اس موقع پر جیسے ہی رشوت خور عہدیدار باہر آیا لوگوں نے اسے گھیر لیا اور ایک شخص کی جانب سے اسے نوٹوں کا ہار پہنانے کی کوشش کی گئی، اس واقعہ کی اطلاع پر ضلع کلکٹر نے معاملے کی تحقیقات کا حکم دیتے ہوئے سخت کارروائی کا عندیہ دیا ہے۔
بین الاقوامی خبر رساں ادارے کی رپورٹ کے مطابق رشوت خور افسرکے ساتھ پیش آنے والا عجیب و غریب واقعہ تلنگانہ کے جگتیال ضلع کلکٹریٹ میں پیر کو پیش آیا جس کی ویڈیو سوشل میڈیا پر وائرل ہوگئی ہے۔