AFP
صوبہ خیبرپختونخوا کے ضلع ڈیرہ اسماعیل خان میں 12 دسمبر کی صبح قریب تین بجے درابن کے علاقے میں چھ حملہ آوروں نے بارود سے بھری گاڑی ایک تھانے کی عمارت سے ٹکرائی جہاں سکیورٹی فورسز کے اہلکار تعینات تھے۔
پاکستانی فوج کے شعبہ تعلقات عامہ (آئی ایس پی آر) کا کہنا ہے کہ اس خودکش حملے میں 23 فوجیوں کی ہلاکت ہوئی ہے جبکہ جوابی کارروائی میں چھ دہشتگرد مارے گئے۔
آئی ایس پی آر کے مطابق ’چھ دہشتگردوں‘ نے درابن میں سکیورٹی فورسز کی پوسٹ پر حملہ کیا، ان کے اندر داخلے کی کوشش کو ناکام بنایا گیا جس کے بعد ’دہشتگردوں نے بارود سے بھری گاڑی عمارت کی دیوار سے ٹکرائی اور خودکش کش دھماکہ کیا۔‘
آئی ایس پی آر نے کہا کہ ’دھماکوں کے نتیجے میں عمارت گِر گئی اور اس سے 23 فوجی اہلکاروں ہلاک ہوگئے جبکہ جوابی کارروائی میں تمام چھ دہشتگرد ہلاک ہوئے۔‘
مقامی لوگوں کا کہنا ہے کہ تھانے کے ساتھ واقع سکول کی عمارت کو بھی دھماکے سے شدید نقصان پہنچا ہے۔
اس حملے کی ذمہ داری کالعدم تنظیم تحریکِ جہاد پاکستان نے قبول کی ہے۔ سوشل میڈیا پر اپنے بیان میں تنظیم کے ترجمان کی جانب سے کہا گیا ہے کہ یہ حملہ ’مولوی حسن گنڈہ پور نے کیا ہے جہاں ان کے ساتھ حملہ آور تھانے کے اندر داخل ہو گئے تھے۔‘
میانوالی ایئربیس پر حملہ
ایسا پہلی بار نہیں ہوا کہ ماضی قریب میں کسی حملے کی ذمہ داری تحریک طالبان پاکستان یا نام نہاد دولت اسلامیہ کے بجائے ایک نئے گروہ تحریکِ جہاد پاکستان نے قبول کی ہوئی۔
نومبر میں پاکستان کے شہر میانوالی کی ایئربیس پرسنیچر کی صبح شدت پسندوں کے ایک حملے میں تین جہازوں کو نقصان پہنچا ہے جبکہ پاکستانی فوج کے شعبۂ تعلقاتِ عامہ کے مطابق جوابی کارروائی کے دوران تین شدت پسندوں کو ہلاک کر دیا گیا۔بیان کے مطابق جن طیاروں کو نقصان پہنچا ہے وہ گراونڈ کیے گئے تھے۔
آئی ایس پی آر سے جاری بیان کے مطابق پاک فضائیہ کے میانوالی ٹریننگ ایئر بیس پر علی الصبح شدت پسندی کے حملے کی کوشش کی گئی تاہم فوج کے بر وقت اور مؤثر جواب کی بدولت اس حملے کو ناکام بنا دیا گیا ہے۔
آئی ایس پی آر کے مطابق ’غیر معمولی جرات اور بروقت جوابی کارروائی کا مظاہرہ کرتے ہوئے تین شدت پسندوں کو اڈے میں داخل ہونے سے پہلے ہی ہلاک کر دیا گیا جبکہ باقی تین حملہ آوروں کو بروقت اور مؤثر کارروائی کے باعث حملے کے دوران مارا دیا گیا۔، پہلے سے گراؤنڈ کیے گئے تین طیاروں اور ایک فیول باؤزر کو بھی کچھ نقصان پہنچا۔‘
آئی ایس پی آر کے مطابق علاقے کو مکمل طور پر کلیئر کرنے کے لیے ایک جامع مشترکہ کلیئرنس اور کومبنگ آپریشن آخری مراحل میں ہے۔
پاکستان میں شدت پسندی سے جڑے حالیہ چند حملے ایسے ہوئے ہیں جن کی ذمہ داری ایک ایسی غیر معروف تنظیم نے قبول کی ہے جس کے بارے میں حکام اوریہاں تک کہ کالعدم تنظیم تحریک طالبان پاکستان کے عہدیدار بھی کچھ نہیں جانتے یا شاید بتانے سے گریزاں ہیں۔
اکثر تجزیہ کار اسے ایک پراسرار تنظیم قرار دے رہے ہیں اور ان کا خیال ہے کہ اس تنظیم کے ترجمان ان حملوں کی ذمہ داریاں تو قبول کرتے ہیں لیکن وہ اپنی تنظیم کے خدوخال کے بارے میں کچھ نہیں بتاتے۔
اس تنظیم کا نام ’تحریک جہاد پاکستان‘ بتایا جا رہا ہے اور اس سے پہلے مئ میں بھی پاکستان کے صوبہ بلوچستان کے علاقے مسلم باغ میں ایف سی کیمپ پر حملے کی ذمہ داری اسی تنظیم نے قبول کی تھی۔
فوج کے شعبہ تعلقات عامہ کے مطابق اس حملے کے بعد فوری طور پر کارروائی کی گئی اور علاقے کو شدت پسندوں سے صاف کر دیا گیا۔ اس حملے میں چھ حملہ آوروں کو ہلاک کر دیا گیا تھا اور اس دوران کیمپ میں موجود چھ سکیورٹی اہلکار بھی ہلاک ہو گئے تھے۔ آئی ایس پی آر کے مطابق حملہ آور جدید اسلحہ سے لیس تھے۔
یہ تنظیم اس سے پہلے چمن، بولان، سوات کے علاقے کبل اور لکی مروت میں حملوں کی ذمہ داریاں بھی قبول کر چکی ہے لیکن ان میں کم از کم دو حملے ایسے ہیں جن میں اس تنظیم کی موجودگی کے شواہد نہیں ملے تھے۔
Getty Imagesیہ تنظیم کب اور کیسے سامنے آئی؟
اس تنظیم کا نام چند ماہ پہلے ہی سامنے آیا جب اس تنظیم نے صوبہ بلوچستان کے سرحدی شہر چمن میں سکیورٹی فورسز پر حملے کی ذمہ داری پہلی بار قبول کی تھی۔
سینیئر صحافی اور خراسان ڈائری کے ڈائریکٹر نیوز احسان اللہ ٹیپو نے بی بی سی کو بتایا کہ اس سال فروری میں انھیں ٹیلی فون پر پیغام موصول ہوا تھا جو بظاہر کسی یورپی ملک کے نمبر سے تھا۔
’کال کرنے والے شخص نے اپنا نام ملا محمد قاسم بتایا اور کہا کہ انھوں نے ’تحریک جہاد پاکستان‘ کے نام سے تنظیم کی بنیاد رکھی ہے لیکن اس تنظیم کے بارے میں مزید کوئی تفصیل نہیں بتائی گئی۔‘
ان کا کہنا تھا کہ اس کے دو دن بعد موبائل فون پر ایک میسج آیا جس میں کہا گیا کہ بلوچستان کے سرحدی شہر چمن میں سکیورٹی فورسز کے اہلکاروں پر حملے کی ذمہ داری وہ اپنی تنظیم کی جانب سے قبول کرتے ہیں۔
اس حملے میں دو سکیورٹی اہلکار ہلاک ہو گئے تھے۔
پاکستان، افغانستان اور وسطی ایشیا میں شدت پسندی اور اس سے جڑے مسائل پر گہری تحقیق کرنے والے تجزیہ کار عبدالسید نے بی بی سی کو بتایا کہ ’تحریک جہاد پاکستان‘ اب تک ایک پراسرار تنظیم ہے جس کی قیادت، ارکان اور وجود کے کوئی شواہد نہیں۔
بعض صحافیوں کو بھیجے گئے مختصر تحریری پیغامات کے ذریعے اس تنظیم کے قیام کا اعلان کیا گیا اور ایک سوشل میڈیا اکاونٹ یا کچھ صحافیوں کو تحریری پیغامات بھیج کر شدت پسند حملوں کی ذمہ داریاں قبول کی گئی ہیں۔
اب تک اس تنظیم کے سربراہ و ترجمان کے نام متعارف کیے گئے ہیں لیکن ان کے ماضی یا حقیقی کردار ہونے سے متعلق کوئی شواہد نہیں۔
اس تنظیم کے ترجمان اپنا نام ملا محمد قاسم لکھتے ہیں، جنھوں نے صحافیوں کی درخواست اور کوشش کے باوجود اب تک کسی سے بات نہیں کی اور فقط تحریری پیغامات بجھوائے ہیں۔
حملوں کی ذمہ داری میں کتنا سچ، کتنا ابہام؟
پاکستان میں اب تک چھ ایسے حملے ہوئے ہیں جن کی ذمہ داری اس تنظیم کے ترجمان نے قبول کی ہے۔ ان پانچ حملوں میں سے دو حملے ایسے ہیں جن میں اس تنظیم کے ملوث ہونے کے شواہد نہیں ملے تھے۔
ان میں ایک حملہ بولان میں اس سال مارچ کے مہینے میں پولیس کی گاڑی کے قریب ہوا تھا جس میں ایک شہری سمیت نو اہلکار ہلاک ہو گئے تھے۔ تحریک جہاد پاکستان نے اس کی ذمہ داری قبول کی لیکن کوئی تفصیل نہیں بتائی۔
اس کے بعد داعش نے اپنے ویب پیچ ’عماق‘ پر اس حملے کی تفصیل جاری کرتے ہوئے ذمہ داری قبول کی تھی۔
اس کے بعد اپریل میں خیبر پختونخوا کے ضلع سوات میں کبل کے مقام پر انسداد دہشت گردی کے تھانے میں دھماکے ہوئے تھے جس میں 17 افراد ہلاک ہو گئے تھے۔
اس حملے کی ذمہ داری بھی تحریک جہاد پاکستان نے ایک پیغام کے ذریعے قبول کی تھی لیکن اس کے بعد تحقیقات سے معلوم ہوا کہ یہ دھماکے تھانے کےاندر پڑے ہوئے بارودی مواد سے ہوئے تھے اور باہر سے کسی حملہ آور کے آنے کے شواہد نہیں ملے تھے۔
اس کے علاوہ اپریل ماہ خیبر پختونخوا کے ضلع لکی مروت میں پوسٹ گریجویٹ کالج پر حملہ ہوا تھا، جس میں جدید اسلحہ استعمال کیا گیا تھا۔ اس حملے کی ذمہ داری بھی ’تحریک جہاد پاکستان‘ کے ترجمان ملا محمد قاسم نے قبول کی اور کہا تھا کہ یہ حملہ ان کے کمانڈر ابوذر نے کیا تھا۔
تنظیم کے بارے میں طالبان کی رائے
اس بارے میں سرکاری سطح پر مکمل خاموشی ہے۔ چند ماہ قبل بھی جب محکمہ انسداد دہشت گردی کے حکام سے اس بارے میں رابطے کی کوشش کی گئی لیکن تو انھوں نے اس تنظیم کے بارے میں کچھ نہیں بتایا تھا۔
سرکاری ذرائع کا کا کہنا تھا کہ ممکن ہے کہ اس تنظیم کا، کالعدم تنظیم تحریک طالبان پاکستان یا القاعدہ وغیرہ سے تعلق ہو۔ ذرائع نے بتایا کہ اس تنظیم میں کون لوگ ہیں، یہ کسی کو نہیں بتایا گیا۔
کالعدم تنظیم تحریک طالبان پاکستان کے ترجمان محمد خراسانی نے بھی اس بارے میں بتایا تھا کہ انھیں اس تنظیم کے بارے میں کوئی معلومات نہیں اور وہ خود اس تنظیم کے لوگوں سے رابطے کی کوششیں کر رہے ہیں۔
اسی بارے میں اپنے آپ کو ٹی ٹی پی ژوب کے علاقے کا عہدیدار ظاہر کرنے والے خالد سر بکف مہمند نے بی بی سی کو بتایا تھا کہ اس طرح کی کوئی تنظیم وجود نہیں رکھتی بلکہ یہ صرف سوشل میڈیا (فیس بک) کی حد تک موجود ہے۔
ان کا کہنا تھا کہ ’اگر کوئی تنظیم ہوتی تو ان کے عہدیدار ہوتے، کوئی سربراہ ہوتا، کوئی تنظیمی ڈھانچہ ہوتا، صرف حملوں کی ذمہ داری لینے سے کوئی تنظیم نہیں بن جاتی۔‘
Getty Imagesفائل فوٹوتجزیہ کاروں کے لیے غیر واضح صورتحال
پشاور میں سینیئر صحافی مشتاق یوسفزئی کا کہنا تھا کہ اس تنظیم کے بارے میں کوئی واضح معلومات تو نہیں لیکن ان کی معلومات اور ملنے والی اطلاعات کے مطابق یہ تحریک طالبان پاکستان سے ہی جڑے لوگ ہیں اور اسی تنظیم کا دوسرا نام ہو سکتا ہے۔
’طالبان جن حملوں کی ذمہ داری نہیں لینا چاہتے وہ اس تنظیم کے نام سے قبول کرا لیتے ہیں۔ اس خطے میں کسی دوسری تنظیم کے وجود کے آثار نظر نہیں آتے اور ان علاقوں میں جس طرح کی کارروائیاں کی جا رہی ہیں وہ طریقہ بھی ٹی ٹی پی سے ہی ملتا جلتا ہے۔‘
تحقیق کار اور صحافی عبدالسید کا کہنا ہے کہ اس تنظیم کے حملوں کی ذمہ داری سے یہ اندازہ ہوتا ہے کہ یہ تحریک طالبان پاکستان کا کوئی ہمدرد گروپ ہے یا اس کا کوئی خفیہ منصوبہ ہے۔
’مثلاً اس نے اب تک صوبہ خیبر پختوانخوا کے ضلع لکی مروت اور بلوچستان کے ژوب ڈویژن میں دو بڑے حملوں کا دعویٰ کیا جہاں پر تحریک طالبان کا آپریشنل نیٹ ورک موجود ہے مگر تحریک طالبان نے اس تنظیم یا اس کی کارروائیوں پر کسی تشویش یا ردعمل کا اظہار نہیں کیا۔ اگرچہ یہ اس کے لیے خطرہ سمجھا جا سکتا ہے کیونکہ انتنظیموں کی تاریخ و سیاست بتاتی ہے کہ یہ اپنے کسی حریف کو باآسانی برداشت نہیں کرتے۔‘
’اسی طرح دوسرا اہم سوال یہ ہے کہ یہ بڑی نوعیت کے حملے تھے، جو یقیناً کسی بڑی منظم تنظیم کی ہی کارروائیاں معلوم ہوتی ہیں۔‘
تحقیق کارعبدالسید کا کہنا تھا کہ دوسرا اہم نقطہ یہ ہے کہ تحریک جہاد پاکستان نے بلوچستان میں تحریک طالبان کی حریف عالمی شدت پسند تنظیم نام نہاد دولت اسلامیہ کی پاکستان شاخ یا داعش پاکستان کے خودکش حملہ کی ذمہ داری قبول کی جس کا بظاھر مقصد داعش کے دعوے کو کمزور دکھانا تھا مگر اب تک تحریک جہاد پاکستان نے تحریک طالبان کے کسی ایسے حملے سے متعلق ذمہ داری قبول نہیں کی۔
احسان اللہ ٹیپو محسود کا کہنا ہے کہ ان کی نظر میں اب تک اس تنظیم کے نام سے جو ذمہ داریاں قبول کی گئی ہیں ان میں ابہام پایا جاتا ہے اور اس کے لیے جو پیغامات کی حد تک اس تنظیم سے رابطہ ہوا، اس بارے میں کوئی ٹھوس جواب اب تک نہیں ملا۔
عبدالسید کا ماننا ہے کہ مستبقل قریب میں اس بات کا اندازہ ہو جائے گا کہ تحریک جہاد پاکستان کی حقیقت کیا ہے کیونکہ اگریہ تحریک طالبان کی خفیہ تنظیم ہے تو یقیناً یہ تعلق زیادہ عرصہ پوشیدہ نہیں رہ سکتا اور یہ اگر تحریک طالبان کے اندر سے ہی کسی بغاوت یا اس کا مدمقابل کوئی نیا گروپ ہے تو وہ بھی جلد واضح ہو جائے گا۔