آسٹریلیا سے کرکٹ ورلڈکپ کا فائنل ہارنے پر بھارتی کرکٹ فین اپنے فیورٹ کھلاڑیوں کو روتا ہوا دیکھ کر دل کا دورہ پڑنے سے انتقال کرگیا۔
بھارتی ٹیم ورلڈکپ 2023 میں مسلسل اپنے 10 میچز جیت کر فائنل میں آسٹریلیا کے ہاتھوں 6 وکٹوں سے شکست سے دوچار ہوئی، ٹورنامنٹ میں ناقابل شکست رہنے والی بھارتی ٹیم کے کھلاڑی فائنل میں ہار کے بعد رو پڑے تھے۔
سوشل میڈیا پر وائرل ویڈیوز میں فائنل میں شکست کے بعد بھارتی بولر محمد سراج کو دیگر کھلاڑیوں کو روتے ہوئے دیکھا گیا۔بھارت کپتان روہت شرما کے آنکھوں میں بھی بظاہر آنسو دکھائی دیے۔
فائنل میں ناقص کارکردگی پر جہاں کچھ بھارتی فینز ٹیم پر برس پڑے وہیں ایک انڈین ٹیم کے مداح نے یہ شکست دل پر لے لی۔
بھارتی میڈیا رپورٹس کے مطابق ریاست آندھرا پردیش کے شہر تروپتی سے تعلق رکھنے والے 32 سالہ سافٹ ویئر انجینیئر جیوتی کمار یادیو بھارت کی شکست کے بعد کپتان روہت شرما کے آنکھوں میں آنسو دیکھ کر بہت افسردہ ہوئے۔
جیوتی کمار یادیو کو اتنا غم ہوا کہ اچانک دل کا دورہ پڑا اور وہ زمین پر گر گئے۔ جیوتی کمار یادیو کے دوست انہیں فوراً اسپتال لے کر گئے لیکن ڈاکٹروں نے انہیں مردہ قرار دیدیا۔