ایک اوور میں چھ چھکے مارنے والا امریکی کھلاڑی لاہور قلندرز کے لیے کھیلنے کو تیار

پاکستان سپر لیگ (پی ایس ایل) کی چیمپیئن ٹیم لاہور قلندرز کے لیے امریکی ٹیم کے وکٹ کیپر بیٹر جسکارن سنگھ ملہوترا نے کھیلنے کی خواہش کا اظہار کیا ہے۔

جسکارن سنگھ ملہوترا انڈین نژاد امریکی کرکٹر ہیں جنہوں نے امریکہ کی قومی ٹیم کی اب تک 18 ون ڈے اور 17 ٹی20 میچوں میں نمائندگی کی ہے جس میں انہوں نے بالترتیب 429 اور 267 رنز بنائے ہیں۔

جسکارن سنگھ ملہوترا کو کرکٹ کی دنیا میں تب شہرت ملی جب انہوں نے 2021 میں پاپوا نیو گنی کے خلاف مسقط میں کھیلے گئے ون ڈے میچ میں 6 گیندوں پر 6 چھکے لگائے۔

اس کے بعد امریکی وکٹ کیپر نے ایک مرتبہ پھر پیر کو ایک مقامی ٹورنامنٹ میں 6 گیندوں پر 6 چھکے رسید کیے جس کے بعد اُن کی آواز لاہور قلندرز کے چیف آپریٹنگ آفیسر اور مینیجر ثمین رانا تک پہنچ گئی ہے۔

سماجی رابطوں کی ویب سائٹ ایکس (ٹوئٹر) پر ایک صارف نے ثمین رانا کو ٹیگ کرتے ہوئے لکھا کہ ’بھائی میں نے سنا ہے کہ لاہور قلندرز کو ایک جارحانہ وکٹ کیپر کی ضرورت ہے۔ براہ کرم یہ دیکھیے۔‘ 

@sameenrana Bhai I heard LQ needs an aggressive Keeper batter? Please take a look https://t.co/1IH1ku5fRJ

— Mohammad Aizaz (@MohammadAizaz07) November 6, 2023

اس کے جواب میں جسکارن سنگھ ملہوترا نے لکھا کہ ’میں لاہور قلندرز کے لیے کھیلنا پسند کروں گا۔‘ 

Would love to play for lahore qalandar https://t.co/B2EJm8vWUd

— Jaskaran Malhotra (@JaskaranUSA) November 6, 2023

جسکارن کی ٹویٹ پر ثمین رانا نے ٹویٹ کرتے ہوئے لکھا کہ ’لاہور قلندرز میں دلچسپی لینے کا شکریہ۔ براہ کرم اگلے ڈرافٹ میں اپنا نام رجسٹر کریں، ہم آپ کو دیکھیں گے لیکن ٹیم میں سلیکٹ کرنے کی گارنٹی نہیں ہے کیونکہ سلیکشن کئی معاملات کو دیکھ کر کی جاتی ہے جس میں مقامی اور غیر ملکی کھلاڑیوں کا توازن دیکھا جاتا ہے۔ ڈرافٹ کے لیے نیک تمنائیں۔‘ 

Thank you for your interest in @lahoreqalandars , please register your name in upcoming draft , we will consider you but can’t guarantee as the selection depend on many factors including the balance of team ( local + foreign players ) Good luck with the draft . https://t.co/osq5yF1Rkz

— Sameen Rana (@sameenrana) November 6, 2023

اس کے جواب میں جسکارن نے لکھا کہ ’جواب دینے کا شکریہ پاجی (بھائی جان)، بالکل میں رجسٹریشن کراؤں گا اور محنت جاری رکھوں گا۔‘ 

Thank you for replying paaji, will definitely register and keep working hard. #PSL #lahoreqalandar https://t.co/vjkranynXG

— Jaskaran Malhotra (@JaskaranUSA) November 6, 2023

خیال رہے جسکارن سنگھ ملہوترا امریکہ کی ٹی20 لیگ ’میجر لیگ کرکٹ‘ (ایم ایل سی) کی فرنچائز لاس انجیلس نائٹ رائیڈرز کی نمائندگی بھی کر چکے ہیں جبکہ اس کے علاوہ کیریبین پریمیئر لیگ (سی پی ایل) میں سینٹ لوشیا کنگز کی جانب سے بھی کھیل چکے ہیں۔