اڑتے جہاز میں بچے کی پیدائش کا واقعہ شاید ہی آپ نے پہلے سن رکھا ہو لیکن گزشتہ روز ایک بنگلہ دیشی خاتون نے سعودی عرب میں اندرون ملک پرواز کے دوران بچے کو جنم دیا۔ اس جہاز میں فٹ بال ٹیم کے کھلاڑی بھی شامل تھے جبکہ ایمرجنسی کی صورت میں ٹیم کے ڈاکٹروں نے بچے کی پیدائش میں خاتون کی مدد کی۔
30 سالہ خاتون جمعہ کے روز شمال مغربی شہر تبوک سے جدہ جانے والے سعودیہ کے طیارے میں سوار تھیں جب انہیں زچگی کی تکلیف کا سامنا کرنا پڑا جبکہ طیارہ اس وقت 36 ہزار فٹ کی بلندی پر پرواز کر رہا تھا۔
دوران پرواز چونکہ خاتون زبان سمجھنے سے قاصر تھیں اس لئے طیارے میں سوار ایک مسافر نے ڈاکٹرز کی طبی ہدایات ترجمہ کرکے خاتون کو بتائی۔ جس کے بعد خاتون نے بحفاظت بچے کو جنم دیا۔ البتہ ڈاکٹروں کا کہنا تھا کہ جب تک ہوائی اڈے پر میڈیکل سپورٹ ٹیم اس معاملے کو مکمل طور پر سنبھال نہیں لیتی تب تک بچے کی نالی نہیں کاٹی جائے گی۔ جہاز لینڈ ہوتے ہی خاتون اور بچے کو فوری امداد فراہم کی گئی۔