Getty Images
بلوچستان سے تعلق رکھنے والے سینیٹر انوار الحق کاکڑ نے پاکستان کے آٹھویں نگران وزیر اعظم کے طور پر حلف اٹھا لیا ہے۔
52 سال کے انوار الحق کاکڑ کا تعلق صوبے میں پشتونوں کے معروف کاکڑ قبیلے سے ہے اور وہ ملک کے اب تک کے کم عمر ترین نگراں وزیراعظم ہیں۔
انوارالحق بلوچستان کے دارالحکومت کوئٹہ میں پیدا ہوئے۔
ان کے والد احتشام الحق کاکڑ نے اپنے کیریئر کا آغاز بطور تحصیل دار کیا جس کے بعد وہ مختلف سرکاری عہدوں پر فائز رہے۔ انوار الحق کاکڑ کے دادا قیام پاکستان سے قبل ریاست قلات میں خان آف قلات کے معالج کے طور پر فرائض سر انجام دیتے رہے۔
انوارالحق کاکڑ نے ابتدائی تعلیم کوئٹہ سے حاصل کی جبکہ انٹرمیڈیٹ کی تعلیم کیڈٹ کالج کوہاٹ سے حاصل کی۔ انھوں نے گریجویشن اور پوسٹ گریجویشن کی تعلیم یونیورسٹی آف بلوچستان سے حاصل کی۔
وہ قانون کی تعلیم حاصل کرنے لندن گئے لیکن سیاست میں دلچسپی کے باعث انھوں نے واپس پاکستان آ کر عملی سیاست میں حصہ لیا۔ انھیں کتب بینی کا شوق ہے۔
انوار الحق کاکڑ نے سیاسی کیریئر کا آغاز مسلم لیگ سے کیا۔ سنہ 1999 میں نواز لیگ کی حکومت کے خاتمے کے بعد انھوں نے ق لیگ میں شمولیت اختیار کی اور ق لیگ کے ٹکٹ پر 2008 میں کوئٹہ سے قومی اسمبلی کی نشست سے انتخاب لڑا۔ تاہم اس میں انھیں کامیابی نہ مل سکی۔
جب 2013 کے عام انتخابات میں بلوچستان میں نواز لیگ اور قوم پرست جماعتوں کی مخلوط حکومت قائم ہوئی تو انوار کاکڑ سابق وزیراعلیٰ سردار ثنا اللہ زہری کی حکومت میں حکومت بلوچستان کے ترجمان رہے۔
2018 میں نواز لیگ مبینہ طور پر اسٹیبلشمنٹ کے ہاتھوں ٹوٹ پھوٹ کا شکار ہوئی تو صوبے میں بلوچستان عوامی پارٹی (باپ) کے نام سے ایک نئی جماعت بنی اور انوارالحق کاکڑ اس کے بانیوں میں سے ایک تھے۔
بلوچستان کی شورش زدہ صورتحال میں انوار کاکڑ ریاستی بیانیے کی بھرپور وکالت کرتے رہے ہیں۔
انوارالحق کاکڑ 2018 میں بلوچستان عوامی پارٹی سے سینیٹر منتخب ہوئے۔
وہ بلوچستان سے بننے والے دوسرے نگراں وزیراعظم ہیں۔ سنہ 2013 میں بلوچستان ہائیکورٹ کے سابق چیف جسٹس میر ہزار خان کھوسو نگراں وزیراعظم رہ چکے ہیں۔
ملکی تاریخ میں اب تک کتنے نگراں وزیرِ اعظم رہے؟ کون کب تک عہدے پررہا؟ کم اورزیادہ مُدت کس کے حصہ میں آئی؟ آئیے یہاں اس کا ایک مختصرجائزہ لیتے ہیں!
Getty Imagesغلام مصطفیٰ جتوئی پاکستان کی تاریخ کے پہلے نگراں وزیرِ اعظمغلام مصطفی جتوئی، پہلے نگراں وزیرِ اعظم
06 اگست 1990 تا 6 نومبر1990
ملک کے پہلے نگران وزیرِ اعظم کا اعزاز غلام مصطفی جتوئی کو جاتاہے۔ آپ کو بتاتے چلیں کہ اِن کی نگرانی میں 1990 میں ملکی تاریخ کے پانچویں عام انتخابات کا انعقاد ہوا تھا اور انتخابات کے نتیجے میں میاں نواز شریف پہلی بار وزیرِ اعظم بنے تھے۔
Getty Imagesبلخ شیر مزاری نے اپریل 1993 میں نگراں وزیر اعظم کا عہدہ اس وقت سنبھالا جب صدر غلام اسحاق نے پہلی مرتبہ وزیر اعظم میاں نواز شریف کی حکومت بر طرف کی بلخ شیر مزاری، نگراں وزیرِ اعظم، مگر الیکشن نہ ہوئے
18 اپریل 1993 تا 26 مئی 1993
بلخ شیر مزاری، ملک کے دوسرے نگراں وزیرِاعظم بنے۔ اِن کی نگرانی میں الیکشن کا انعقاد نہ ہوسکا تھا۔ معاملہ یہ ہوا کہ 19اپریل 1993کو صدر غلام اسحق خان نے آٹھویں ترمیم کے ذریعے میاں نواز شریف کی حکومت کو برطرف کردیا اور بلخ شیر مزاری کو نگراں وزیرِ اعظم مقررکردیا۔ مگر سپریم کورٹ نے میاں نوازشریف کی حکومت کو بحال کردیا اور یوں نگراں حکومت کالعدم ہوگئی۔ اس طرح بلخ شیر مزاری محض 39 دِن وزیرِ اعظم رہے۔
Getty Imagesمعین قریشی نے نگراں وزیر اعظم کا عہدہ اس وقت سنبھالا جب میاں نواز شریف کی حکومت 18 جولائی 1993 میں ختم کی گئی معین قریشی، درآمد شدہ نگراں وزیرِ اعظم
18جولائی 1993 تا 19 اکتوبر 1993
تاہم 1990میں قائم ہونے والی حکومت اپنی مُدت پوری نہ کرسکی اور نئے انتخابات کا انعقاد 1993میں ہوا۔
اس بار نگراں وزیرِ اعظم کا قرعہ معین قریشی کے نام نکلا۔ معین قریشی کو ملک سے باہر سے لا کر نگراں وزیرِ اعظم بنایا گیا۔1990 انتخابات کے نتیجے میں بے نظیر بھٹو دوسری بار وزیرِ اعظم بنیں۔
معراج خالد ،ایک عام آدمی جو نگراں وزیراعظم بنا
5 نومبر 1996 تا 17 فروری 1997
1993میں بننے والی بے نظیر بھٹو کی حکومت بھی مُدت پوری نہ کرسکی اور 1997میں عام انتخابات ہوئے۔ اس بار ملک معراج خالد کو نگراں وزیرِاعظم بنایا گیا۔ معراج خالد ایک شریف اور پڑھے لکھے سیاست دان کی شہرت رکھتے تھے۔ یہ ایک عام آدمی تھے، جو اس منصب تک پہنچے۔
انتخابات کے نتیجے میں میاں نواز شریف دوسری بار وزیرِ اعظم بنے۔ مگر بھاری مینڈیٹ سے منتخب ہونے والے وزیرِ اعظم کی حکومت بھی اپنی مُدت پوری نہ کرسکی۔
نگراں سیٹ اَپ تشکیل نہیں پایا تھا۔ 2002 کے انتخابات جنرل پرویز مشرف کے دورِ اقتدار میں ہوئے۔
Getty Imagesمحمد میاں سومرو فوجی حکمراں جنرل پرویز مشرف کے دور میں منتخب ہونے والی ایوان کی مدت پورے ہونے پر نگراں وزیر اعظم تقرر کیے گئےمحمد میاں سومرو، طویل المدت نگراں وزیر اعظم
16 نومبر 2007 تا 25 مارچ 2008
2008 کے انتخابات میں محمد میاں سومرو نگراں وزیرِ اعظم رہے۔ انتخابات کے نتیجے میں یوسف رضا گیلانی وزیرِ اعظم منتخب ہوئے۔ دسمبر 2007 میں بے نظیر بھٹو قاتلانہ حملے میں وفات کی وجہ سے انتخابات تاخیر کاشکار ہوئے تھے۔
یہ سب سے طویل مُدت کے لیے نگراں وزیرِ اعظم رہے، یعنی4 ماہ اور8 دِن۔
Getty Images2013 میں پاکستان پیپلزپارٹی کی حکومت نے اپنی مُدت پوری کی جس کے بعد میرہزار خان کھوسو کو نگراں وزیر اعظم بنایا گیامیر ہزار خان کھوسو، چھوٹے صوبے کا نگراں وزیرِ اعظم
25 مارچ 2013 تا 5 جون 2013
پاکستان پیپلزپارٹی کی حکومت نے اپنی مُدت پوری کی اور 2013 میں عام انتخابات ہوئے۔
بلوچستان سے تعلق رکھنے والے میرہزار خان کھوسو کو نگراں وزیر اعظم بنایا گیا۔ ان انتخابات میں میاں محمد نواز شریف تیسری بار وزیرِ اعظم منتخب ہوئے۔
سابق چیف جسٹس ناصر الملک، عدلیہ سے تعلق رکھنے والے نگراں وزیرِ اعظم
یکم جون 2018 تا 18 اگست 2018
2013میں قائم ہونے والی حکومت نے اپنی مُدت پوری کی اور2018 میں ملکی تاریخ کے گیارہویں عام انتخابات ہوئے۔ ان انتخابات کی نگرانی کے لیے سابق چیف جسٹس ناصر الملک کو نگراں وزیر اعظم مقرر کیا گیا۔ جسٹس ناصر الملک کو بطور نگراں وزیرِ اعظم کا فیصلہ قائد ایوان اور قائد حزب اختلاف نے کیا تھا۔