انڈیا کے دارالحکومت دہلی میں پولیس نے نیپالی شہری کے خلاف جہاز میں عملے کے ساتھ گالم گلوچ کرنے اور لیٹرین کا دروازہ توڑنے پر مقدمہ درج کیا ہے۔انڈین نیوز چینل ’این ڈی ٹی وی‘ کے مطابق ایئر انڈیا کے اس جہاز نے کینیڈا کے شہر ٹورنٹو سے پرواز بھری تھی۔عملے کے سپروائزر ادیتیا کمار کا کہنا تھا کہ مہیش سنگھ پنڈت نامی مسافر نشست 26 ای کے بجائے 26 ایف پر بیٹھ گیا اور اکانومی کلاس کے عملے کے ساتھ بدتمیزی شروع کر دی۔ عملے نے پائلٹ کو اطلاع دی اور مسافر کو وارننگ دی۔ادیتیا کمار نے کہا کہ بعد ازاں کھانے کے بعد دھوئیں کا الارم بجا اور جب انہوں نے لیٹرین کا دروازہ کھولا تو مسافر کے ہاتھ میں سگریٹ جلانے والا لائٹر دیکھا اور تمباکو کی بدبو محسوس کی۔’جب میں نے دروازہ کھولا تو اس نے مجھے دھکا دیا اور جب میں نے اسے روکنے کی کوشش کی تو اس نے مجھے مزید دھکیلا اور گالیاں دیں۔ پھر اس نے لیٹرین کا دروازہ توڑ دیا۔ میں نے پائلٹ کو بتایا تو ان کی ہدایت پر عملے نے اس پر قابو پایا۔‘ادیتیا کمار نے ایف آئی آر میں لکھوایا کہ مسافر پر 10 دیگر مسافروں کی مدد سے قابو پایا گیا، لیکن بعد میں ملزم نے باقی مسافروں کے ساتھ بھی جھگڑا کیا اور انہیں مارا۔دہلی پولیس نے اس مسافر کے خلاف آئی جی آئی پولیس سٹیشن میں مقدمہ درج کرلیا۔