وزیر اعظم شہباز شریف نے سویڈن میں قرآن مجید کی بے حرمتی کے واقعہ کے خلاف جمعہ کو ملک گیر احتجاج کی کال دے دی۔
وزیراعظم کی زیر صدارت اجلاس میں سویڈن واقعے پر 7 جولائی کو یوم تقدس قرآن کے طور پر منانے کا فیصلہ کیا گیا ہے، جس کے تحت ملک گیر احتجاجی ریلیاں نکالی جائیں گی۔
رپورٹ کے مطابق، وزیر اعظم کی زیرصدارت اہم اجلاس میں سویڈن میں قرآن کریم کی بے حرمتی کے معاملے پر تبادلہ خیال کیا گیا اور فیصلہ کیا کہ 7 جولائی کو یوم تقدس قرآن کے طور پر منایا جائے گا۔
وزیراعظم شہبازشریف نے تمام سیاسی جماعتوں سمیت پوری قوم سے اپیل کی کہ وہ شرپسندوں کو متحد ہو کر پیغام دینے کے لیے مظاہرے میں شرکت کریں۔
شہباز شریف نے اجلاس کے شرکا سے خطاب کرتے ہوئے کہا کہ پوری قوم ایک زبان ہوکر شیطانی ذہنوں کو پیغام دے، قرآن کریم کی عزت وحرمت ہمارے ایمان کا حصہ ہے، اس کے لئے ہم سب ایک ہیں، گمراہ ذہن اسلاموفوبیا کے منفی رجحان کو پھیلا کر مذموم ایجنڈے پر عمل پیرا ہیں۔
وزیراعظم نے سویڈن واقعے پر جمعرات کو پارلیمنٹ کا مشترکہ اجلاس بلانے کا بھی فیصلہ کرتے ہوئے واقعے پر قومی لائحہ عمل مرتب کرنے کی ہدایت کی اور کہا کہ پارلیمنٹ کے فورم سے قوم کے جذبات اور احساسات کی بھرپور ترجمانی کی جائے، پارلیمنٹ کے مشترکہ اجلاس میں مشترکہ قراردادمنظور کی جائے۔
انہوں نے مزید کہا کہ، دیگر غیر اسلامی ممالک بھی جوعالمی سطح پر پرامن، متوازن اور بین المذاہب ہم آہنگی پر یقین رکھتے ہوں، وہ بھی مل کر ایسے رجحانات اور واقعات کی بھرپور مذمت کریں اور اسکے خاتمے کیلیئے کام کریں۔