امریکی صدر جو بائیڈن نے کہا ہے کہ مغربی ممالک کا روس کے نیم فوجی دستے ویگنر کی بغاوت سے کوئی تعلق نہیں ہے۔فرانسیسی نیوز ایجنسی اے ایف پی کے مطابق جو بائیڈن کا کہنا تھا کہ وینگر گروپ کی ماسکو کی جانب پیش قدمی روکنے کے بارے میں کوئی نتیجہ اخذ کرنا ابھی قبل از وقت ہے۔ان کا کہنا تھا کہ ’ہم گذشتہ ہفتے کی صورتحال اور اس کے روس اور یوکرین کے لیے مضمرات کا جائزہ لے رہے ہیں۔ ابھی یہ کہنا قبل از وقت ہے کہ صورتحال کس طرف جا رہی ہے۔‘تاہم انہوں نے کہا کہ وہ اور مغربی اتحادی آپس میں رابطے میں ہیں اور انہوں نے یوکرینی صدر ولادیمیر زیلنسکی سے کہا ہے کہ انہیں امریکہ کی مضبوط حمایت حاصل رہے گی۔’روس میں جو بھی ہوا امریکہ یوکرین کے دفاع اور علاقائی خودمختاری کی حمایت کرتا رہے گا۔‘امریکی صدر نے ان سازشی نظریوں کی تردید کی کہ بغاوت میں مغرب ملوث ہے۔ان کا کہنا تھا کہ ’یورپی لیڈروں سے زوم پر بات کی اور انہوں نے اتفاق کیا کہ ہم روسی صدر ولادیمیر پوتن کو موقع نہیں دیں گے کہ اس کا الزام مغرب اور نیٹو پر لگائیں۔ یہ بغاوت روسی نظام کے خلاف جدوجہد کا حصہ تھی۔‘انہوں نے کہا کہ پیر کو اہم اتحادیوں کے ساتھ دوبارہ رابطہ ہو گا لیکن انہوں نے یہ نہیں بتایا کہ کون سے رہنماؤں سے بات کریں گے۔جو بائیڈن نے سنیچر کو فرانسیسی صدر ایمانویل میکخواں، جرمن چانسلر اولاف سکولز اور برطانوی وزیراعظم رشی سوناک سے مشورہ کیا تھا۔