حکومت نے جون کے گرم موسم میں غربت کے مارے عوام پر نوازشات کی برسات کردی، ملک میں آٹا، گھی، کوکنگ آئل، پیٹرول اور ڈیزل مزید سستا ہوگیا۔
وزیراعظم کی جانب سے آٹے کے بحران سے متعلق نوٹس کے بعد خیبر پختونخوا کی مارکیٹوں میں 20 کلو کے تھیلے میں 700 روپے کی نمایاں کمی ہوگئی ہے۔ پشاورمیں 20 کلو آٹے کا تھیلا 3 ہزار 300 روپے سے کم ہو کر 2 ہزار 600 روپے میں فروخت ہورہا ہے
حکومت نے یوٹیلیٹی اسٹورز پر مختلف برانڈ کے بناسپتی گھی اور کوکنگ آئل کی قیمتوں میں کمی کردی ہے جس کے بعد گھی کی قیمت 585روپے سے کم ہوکر517 روپے فی کلو ہوگئی ہے، بناسپتی گھی کی فی کلوقیمت میں بھی 68روپے تک کمی کی گئی ہے۔
یوٹیلیٹی اسٹورز پر کوکنگ آئل 93روپے فی لیٹر تک سستا ہونے کی وجہ سے کوکنگ آئل کی قیمت 610 روپے سے کم ہوکر517 روپے ہوگئی، قیمتوں میں کمی کا اطلاق آج سے ہوگیا ہے۔
حکومت نے یکم جون سے پیٹرول، ڈیزل اور دیگر پیٹرولیم مصنوعات کی قیمتوں میں آئندہ 15 روز کے لیے کمی کردی ہے۔ وزیرخزانہ اسحاق ڈار نے پریس کانفرنس میں اگلے 15 دنوں کے لیے پیٹرول کی قیمت میں 8 روپے فی لیٹر، ڈیزل کی قیمت میں 5 روپے اور لائٹ ڈیزل کی قیمت میں 5 روپے فی لیٹر کمی کا اعلان کیا۔
پیٹرول کی نئی قیمت 270 سے کم کر کے 262 روپے فی لیٹر، ڈیزل کی قیمت 258 سے کم کر کے 253 روپے فی لیٹر اور لائٹ ڈیزل کی قیمت 152 سے کم کر کے 147 روپے فی لیٹر کر دی گئی ہے۔ مٹی کے تیل کی قیمت میں کوئی تبدیلی نہیں کی گئی جو 164.70 روپے فی لیٹر پر مستحکم ہے۔
15 مئی کو وزارت خزانہ نے پیٹرول، ڈیزل اور دیگر پیٹرولیم مصنوعات کی قیمتوں میں کمی کی اطلاع دی تھی۔ پیٹرول کی قیمت میں 12 روپے فی لیٹر، ہائی اسپیڈ ڈیزل کی قیمت میں 30 روپے فی لیٹر، لائٹ ڈیزل کی قیمت میں 12 روپے فی لیٹر اور مٹی کے تیل کی قیمت میں 12 روپے فی لیٹر کمی کی گئی تھی۔