پی ٹی آئی کے چیئرمین عمران خان نے میڈیکل رپورٹ کے حوالے سے بے بنیاد دعوے کرنے پر وفاقی وزیرِ صحت قادر پٹیل کو 10 ارب روپے کے ہرجانے کا نوٹس بھجوا دیا۔
نوٹس میں کہا گیا ہے کہ عبدالقادر پٹیل 15 روز میں اپنے الزامات واپس لیں فوری طور پر چیئرمین پی ٹی آئی سے غیر مشروط معافی مانگیں۔
نوٹس میں مطالبہ کیا گیا ہے کہ عبدالقادر پٹیل 10 ارب روپے بطور ہرجانہ ادا کریں جسے شوکت خانم اسپتال میں جمع کروایا جائے گا۔عمران خان کی جانب سے کہا گیا ہے کہ عبدالقادر پٹیل نے معافی نہ مانگی تو قانونی کارروائی آگے بڑھائیں گے۔
یاد رہے کہ وزیر صحت عبدالقادر پٹیل نے دعویٰ کیا تھا کہ عمران خان کے یورین سیمپل سے شراب اور کوکین کے اجزاء پائے گئے ہیں۔
انہوں نے کہا کہ میڈیکل رپورٹ میں عمران خان کی ذہنی حالت پر بھی سوالیہ نشان لگایا گیا اور کہا گیا کہ اُن کی حرکات و سکنات فٹ آدمی کی نہیں تھیں۔
وفاقی وزیر نے مزید کہا کہ عمران خان کی میڈیکل رپورٹ میں فریکچر نہیں پاؤڈر نکلا ہے، چیئرمین پی ٹی آئی 5، 6ماہ پلستر چڑھا کر گھومے، مگر فریکچر نہیں تھا۔